【头条独家】日食四餐谷肥30磅操肌 张振朗攞苦嚟辛挑战自己

最近张振朗(Owen)因为违泊，食咗碗300几蚊嘅超贵米线，当事人否认因为为食而被罚：「疫情前日日跟有健身教练资格嘅同事关梓阳(Leo)做exercise操肌，兼且要食埋啲高蛋白质嘅操肌餐单，食到好乏味，𠵱家健身室关闭哂，计划不似预期咪可以放肆吓罗。」今年初夺台庆「飞跃进步男艺员」嘅张振朗希望努力操好副Body，仲希望拍啲打得好劲嘅动作片，32岁嘅佢坦言，「呢啲梗系趁后生去做。」采访：方骞平

因为「超贵米线」事件，好多人都好关心张振朗，返到公司有唔少同事提醒他记得交罚款，他啼笑皆非，无奈苦笑说：「都怪自己疏忽，今次提醒自己唔好贪方便违泊。其实我唔系为食嘅，平时肚饿先食嘢，嗰日做完商台访问赶住去龙鼓滩拍戏，谂住快食，点知好快被抄牌，一碗面要300几蚊都好心痛，以后会小心啲。」Owen提到因为自己过瘦，所以跟关梓阳做exercise改善体形，其间要配合进食高蛋白质嘅操肌餐单，「最惨系𠵱家关闭哂健身室，所有嘢都要急煞停，搞到我同gym友朱敏瀚（Brian）失晒方向，进展停滞不前。呢段时间只可以喺屋企尽量keep吓，做吓掌上压，饮食方面都要小心啲。」

迫自己食嘢最辛苦

「排骨仔」张振朗说目标要操得更加大只，体形更加结实：「之前操比较乾身，只需食少啲，做多啲运动就可以；但𠵱家想操得大嚿少少，所以先要食肥少少，然后再加操，要添多一个进程，难度更大，尤其食嘢方面好讲究。」Owen又提到做Exercise其间必须一日食足四餐，早上食麦皮加四只连蛋黄嘅鸡蛋，加多块花生酱面包。「其实食完经已好饱，下昼做完运动，约四点钟食第二餐，要食好多饭加手掌咁大块嘅扒类，再要喺晚上九点前食多两餐饭，唯有迫自己食锺意食嘅嘢，好似牛扒，希望食得舒服啲。」

张振朗愈讲愈惨，「原来增磅系件几辛苦嘅事，我会提早半小时起身开工，极速整饭盒带返工做下午茶同宵夜(宵夜剧组多数提供云吞面或汉堡包)，午饭会要求剧组提供走皮、走汁嘅鸡胸饭(午饭多数提供烧味饭)。我由最瘦130磅增至150几磅喇，但目标仲要增多10几磅，有啲观众见我拍《踩过界2》面口胀晒，喺我IG留言问我点解会咁？话几乎唔认得我，食得咁辛苦都见有成效㗎。」

告别hehe挑战打戏

张振朗扬言会排除万难去改变体形，挑战自己：「《踩过界2》我唔使除衫，唔使同Show肌嘅王浩信比较，我唔系要做大只佬，但唔想太瘦，既然keep住呢个状态经已好几年，不如试吓新方式，想挑战另一样嘢，希望畀啲新嘢观众睇吓，开拓更多角色领域。」问到是否年初得奖后要突破自己，唔想再做hehe角色？张振朗强调工作态度一向如是，唔想角色千篇一律，希望每个角色都有新体验。「可能下次由肥变瘦，再翻肥，有机会嘅话，想拍一套凑住小朋友嘅后生仔角色，我好锺意小朋友，如果剧中可以做返自己，将真实特质畀观众睇吓都几得意；另外可以拍吓打得好劲嘅动作片，好似陈展鹏《唐人街》咁。」提到佢咁样系攞苦嚟辛，他坦言，「𠵱家32岁，呢啲要趁后生去做。」