【头条独家】贻兴狂闹 轰滞留秘鲁港女被围插 项明生笑言绝冇留言赞自己

滞留秘鲁港人S小姐向传媒求助，抱怨隔离期间旅舍膳食太差，旅游达人项明生（James）睇唔过眼在网上平台批评「明知外有毒，偏向病毒行」。批评风波愈滚愈大，作家王贻兴更在社交网站发帖狂闹，怒插项明生断章取义抹黑S小姐。同王贻兴从没积怨的项明生被辣㷫，「我谂有人宅喺屋企要有存在感，呃啲like返嚟。」对于在FB专页留言赞自己被cap图疯传，James强调无做过，「点会自己同自己讲嘢咁好笑？」采访：方骞平

对于今次突然成为箭靶，项明生坚持以事论事，绝不后悔！他说：「我觉得有啲人将好简单嘅事套入政治立场，原先只系话个女仔食得咸鱼抵得渴，去旅行预咗有啲咁嘅状况，呢啲自己解决啦！你点解要系咁埋怨，怨天尤人？王贻兴就对号入座，加入政治色彩斗争，咁样会令到社会好撕裂，我觉得唔同政治立场唔系势不两立嘅，做人要讲道理，讲逻辑、讲思维。我同王贻兴无怨无仇，净系喺书展见到面会打两个招呼，大家完全系无接触，我唔知点解佢突然用啲好人生攻击嘅嘢，喺佢个fb写埋粗口攻击我，我谂有人要有存在感，想搵啲眼球，呃啲like返嚟，可能呢个时候啲人宅喺屋企闷得滞啩。」

无喺墨西哥扫口罩
被王贻兴指责「有口话人」的项明生在今年二月疫情开始严峻下继续出发去日本旅行，又指他于墨西哥旅行时，扫晒当地口罩及消毒用品，之后放上网呃Like。James解释去日本系为和歌山观光局工作，履行工作合约。同时，他没有狂扫口罩：「我带团友喺一月尾去墨西哥，当时嗰度一单确诊都冇，每个团友净系买到5个口罩，搓手液每人3枝，包括我在内，其实好多香港人都喺海外买口罩啦。因为我同所有团友嘅物资一齐影咗张相，啲人以为我好多货。」

无自己同自己讲嘢
对于有网民发现他喺自己的fb专页留言赞自己「闹得好写得好」，James带笑回应：「我唔知张相喺边度嚟㗎喎，我又冇自问自答，𠵱家网络上面有好多PS、好多骗案，啲人就以讹传讹，我可以讲，我从来冇自问自答，点会自己同自己讲嘢？我觉得好好笑，得啖笑，今朝笑咗好耐呀！哈！我真系觉得好好笑呀，点都好啦，新冠肺炎全球大流行，𠵱家大家好需要正能量嚟抗疫！反正外游工作被迫煞停，留港空档则用嚟做善事，之前我落咗深水埗同明哥派咗300个饭盒畀露宿者，我仲捐咗300个fans送嘅口罩畀佢哋，反正我都够口罩用，希望人人有罩用，齐心来抗疫。」

提早拍摄被赞有脑
James表示，喺2月尾，眼见钻石公主号确诊数字系咁升，觉得当中会有好多变数，所以提议去日本的拍摄工作改早半个月，免得夜长梦多：「最后连和歌山观光局都赞我劲，有先见之明知道会封城，其实我纯粹系猜测，因为我锺意日本，知道日本决策要稳阵，往往会慢几拍。由于和歌山唔系大城市，而且今次主要深入冇乜人到嘅秘境，其中去咗天满宫、东召宫睇梅花，两个神宫都冇人，相对和歌山冇大城市气氛咁紧张，较重灾区北海道较安全。我又喺德川家康嘅城堡扮成将军，写绘马为香港祈祷，仲好好彩喺乡下地方仅用正价100日圆(约7元港币)买到最后一包粉红色小童口罩。」