【头条独家】移民苏格兰前再落区派口罩 乔宝宝百厌撩阿婆
2020-03-26 19:13 
印度裔艺人乔宝宝铁定本月尾飞返苏格兰「交人」，日前最后一次落区派口罩及福袋，临别依依，宝宝虽然唔舍得到失眠，但做起善事劲精神爽利，仲口花花撩阿婆，贯彻搞鬼本色。采访：方骞平
乔宝宝坚持帮返香港「屋企人」做啲嘢，唔觉得派口罩要攞返个Credit，所以做得轻松自在。日前他跟杨玉梅(士多啤梨)去到尖沙咀坊会松柏邻舍活动中心派口罩及福袋畀长者，之后仲上埋去附近唐楼亲自派畀唔方便上落嘅老人家。其间乔宝宝不忘发挥搞笑本色撩阿婆，笑言要抱住「两件」嚟影合照先！又追问：「你哋锺唔锺意食咖哩呀？」又提公公婆婆唔好当豉油系红酒！还叮嘱大家睇多啲乔宝宝，阿公阿婆会身体好，惹来全场欢笑声。
杨玉梅提宝宝禁欲
上到唐楼，宝宝派完福袋又问85岁独居婆婆：「你记唔记得我呀？印度刘德华呀？」婆婆竟然话唔知，因为她经已91岁，宝宝就搞笑回应：「哈！真系唔似91，我仲以为你得90岁啫。」呢几日不停有朋友请宝宝食饭饯行，提到英国疫情都好严重，乔宝宝飞前紧贴事态发展：「阿囝叫我返到嚟要自我隔离，唔好搵阿妈住，但对住老婆就唔怕。」杨玉梅取笑他要禁欲，提他要同老婆分房瞓，唔淮掂、唔可咀：「嗱！你乖乖地，食『饱』先返去，唔好『饿』住走。」乔宝宝尴尬话：「呢两个礼拜冇得『行埋』！我都知老婆『饿』咗好耐，疫情关系冇办法，大家都要隔住口罩锡锡。」士多啤梨又追问他，咁香港「阿3」、「阿4」等点处置，舍得咩？宝宝笑住回答：「印度人一夫一妻制，但女性朋友系唔计！」另外，杨玉梅喺《法证先锋IV》中饰演虎妈获赞，连她都睇到心寒，但最开心可以搭到「尾班车」同梅小青合作。
最新回应