【头条独家】初次捧爸爸场煲剧 黄浩然爆囝囝迷上扮法证

黄浩然最近首度参与《法证》系列演出，在《法证先锋IV》中饰演高级化验师「高安」，该剧keep住有高收视，浩然觉得在疫情下带给观众娱乐也觉安慰。原来这套剧亦是浩然两个囝囝，8岁多的Kayden和6岁多的Ransley，第一次捧爸爸场煲剧，浩然仲自爆两个仔已变《法证》粉丝，不单嫌每集太短，甚至会扮埋法证人员，相当搞笑。撰文：杜淑霞 摄影：梁志明 发型：DY@Muse

剧集首周7天跨平台总收视35.7点，浩然最开心在疫情下帮到大家解闷，「最开心可以倍伴到香港巿民喺疫情里面有啲娱乐同放松嘅机会。」讲到首次跟郑希怡合作，浩然竟然话因太熟有点影响，「我哋识咗好耐，但系正式合作系第一次，初头都要搣甩望住佢笑㗎！因为真系太熟啦！都冇谂过点同佢演情侣。」幸好出来效果，浩然都觉满意。

开心囝囝变粉丝
疫情下，浩然自爆两个囝囝首度有机会捧爸爸场，「其实今次系两小朋友第一次睇我嘅演出，咁耐冇乜睇过我嘅演出，今次《法证》两个小朋友冇返学个几月啦！要做功课、要放嘅电都做晒，佢哋就提议不如捧爸爸嘅场啦！不过有啲画面同情节唔系太适合佢哋睇，我就同佢哋讲明，唔啱睇嘅佢哋要瞌埋眼㗎！佢哋都话OK嘅。」点知两个囝囝一睇即变铁粉，「细仔就问点解咁快完㗎！应该做耐啲嘛！又话乜原来一集得4节，点解唔可以有5、6节㗎！我有一日瞓醒见大仔就戴住我出街嗰副有颜色嘅太阳眼镜，揸住支电筒喺度周围照喎！我一出嚟睇到，fans嚟喎！佢即刻会模仿罗！几开心嘅，系几特别嘅一样嘢。」