【头条独家】半岁劲醒 唔想囡囡性格霸道　黄泽锋与太太鼠年筹备追多个

猪年对黄泽锋和太太陈丽丽绝对是兴奋的一年，因年中诞下金猪B女熙恩（乳名小黄妃），虽然过程惊险，但小黄妃愈大愈精灵，半岁人仔已识得做「give me five」，亦相当有性格，这天影贺年全家福太倦，即时发脾气唔睬妈咪，但cute样足以冧晕全场。正因囡囡劲醒目兼万千宠爱在一身，泽锋和太太好担心她会持宠生骄，性格变得霸道，鼠年会开始计划为她添个细佬妹，所以新一年两夫妻首要愿望就是全家人平安健康，泽锋工作机会更多，搵定下胎奶粉钱。 撰文：杜淑霞 摄影：李权威 BB服装及场地：知沁制作

对于过去的猪年，泽锋过得相当满意，「冇谂过年头忙到年尾，真系好托赖，最开心梗系囡囡出世，我哋唔系好特别嘅职业，只系教拳同教游水，仲有戏拍，又生埋个女，原来猪年几利我喎！哈哈！」丽丽认为小黄妃的出现令人生改变，她转型做全职妈咪，「有咗小朋友成个生活同作息都唔同晒，每日都希望争取时间同佢一齐，因为佢日日都有变化，好似佢之前唔认人，呢排会望真先肯畀人抱，又变得好黐身，我哋喺屋企就唔可以离开佢视线。」

好有性格
囡囡大得快，泽锋不想错过小情人成长，丽丽爆他工作之间有少少空档都摄返屋企睇B，「佢搵阿女义电，系佢精神支柱嚟，阿囡又好醒知佢返嚟，就会扭佢㗎！」这天影相，小黄妃好识望镜头，丽丽忍唔住爆，「佢最锺意望镜头同影相，演戏仲叻过爸爸，唔畀佢食手指佢会扮嘢。」泽锋说：「佢好识谂桥好古惑，咁细个都识得投诉，所以佢救命就搵老窦，阿妈系执法。」影相时因要快速换衫，被妈咪舞完一轮的小黄妃相当不满，一度嬲猪唔睬妈咪，平日好叻「畀个5」的她，即系扭计唔肯做，丽丽都笑言：「佢好有性格，不过系好事嚟嘅。佢骨头都硬净又有力水，身体机能都几好。（大啲可以学拳同游水？）我哋会强制佢学，因为游水系求生本能，而佢又系女仔学拳可以保护自己，但佢将来做咩我哋好开放，只要唔系三分钟热度就得。」泽锋就补充，「𠵱家年代唔同咗，好多嘢都冇得迫，佢𠵱家6个月都咁有性格，6岁咪不得了。」

做好调理
踏入鼠年，泽锋首要想搵钱，「搵多啲钱，等生活再好啲，展望下年希望大家和平和谐，样样嘢都顺畅，屋企人最紧要齐齐整整就放心。」丽丽就话：「佢都好辛苦，希望佢有健康身体先可以搵钱，所以成个家庭都要健康。」原来鼠年他们更有意为追多个准备，丽丽说：「最初谂住要一个就算，但当佢一个嘅时候会惊佢闷。（泽锋：同埋惊纵坏，所有嘢都好易得到，以为理所当然。）又唔识得分享，个人更加霸道。」虽然丽丽发现52岁生B，已不算高龄产妇，但想要下一胎一样要养好身体，「诊所啲姑娘都话有啲大过我都生到，但系如果再有，身体要keep得更加好，做好调理，因为呢胎都伤，要keep住睇紧啲饮食，因为我仲喂紧人奶，要keep得好好，做番多啲运动，最紧要身体机能好。」