【古天后日志】期指结算料可守二万八关

12月30日，天阴，间中有雨，潮潮湿湿咁，好似春天已到，咁究竟香港冬天O左几多日??美汇指数跌穿97，包括人民币离岸价及其他外汇价格上升。上周五美股个别发展，道指跟标指再创收市新高，而纳指则结束11个交易日升势，跌O左15点，但仍企喺9000点楼上。至于港股喺ADR及夜期变货唔大，一跌一升，目前恒指喺新加坡黑期亦只有窄幅上落，于28200水平之上徘徊。今日期指结算，如无意外今年港股可以喺28000水平终结。不过明日半日市，后日又系假期，上星期五虽然完O左圣诞节假期开O左一日工，但假日情怀依旧浓厚，唔少缸边友甚至外游未返，估计呢两日港股交投会较淡静。 港股嚟到今年最后一个半交易日，好友喺12月占尽上风，今日期指结算，睇嚟要喺28000楼上结算唔成问题。相对美股，港股其实落后得好紧要，不过呢个别股份一直跑赢大市，好似阿里巴巴(09988)同美团(03690)呢两只新经济龙头股，未来获纳入恒指成份股机会极高，有货当然要坐定定，要无货喺手，亦要吼位趁回调储定货，等待来年两股染蓝。 展望2020年，新经济股占恒指比重只会愈来愈高，而内地企业占港股比重亦有增无减，持续增加，嚟紧上半年较为瞩目嘅新经济股，应该系有望于上半年来港上市嘅抖音。随住港股愈嚟愈中企化，若然单睇本港经济嚟判断港股走势，肯定错到加零一，唔好再问本港经济前景欠佳，连财爷同经济局长都大叫头痛嘅时候，点解港股仍然可以喺第四季重上二万八水平。要确切掌握投资风向，投资港股时，应注意内地经济情况，多于睇香港本地经济发展。 内地股市喺今年完结前走势转佳，主要系有消息指人行短期内将降准，支持A股向上，所以古天后早于两个星期前，已叫要吼住内地券商股。虽然人行降准对内银股有一定刺激，不过古天后对内银股有戒心，睇好内地股市，识买宁愿买内地券商股。而内险股亦系另一选择，除O左内险之馀，友邦(01299)喺内地进一步开放金融市场下，早着先鞭嘅友邦当然有优势。 至于5G概念跟手机设备股，暂时谂唔到一个理由要放弃，睇嚟短期呢两个板块仍会以大涨小回模式向上推进。唔少人够胆买落后股，对于强势股反而无胆高追，其实喺投资市场永远都系跟红顶白，前辈曹仁超嘅金句系「有智慧不如趁势」，几时都系跟住大势走，落后股非资金主流，何解要输机会成本等运到咁蚀底。 古天后 (徐狄怡，证监会持牌人)