【古天后日誌】期指結算料可守二萬八關

12月30日，天陰，間中有雨，潮潮濕濕咁，好似春天已到，咁究竟香港冬天O左幾多日??美匯指數跌穿97，包括人民幣離岸價及其他外匯價格上升。上周五美股個別發展，道指跟標指再創收市新高，而納指則結束11個交易日升勢，跌O左15點，但仍企喺9000點樓上。至於港股喺ADR及夜期變貨唔大，一跌一升，目前恒指喺新加坡黑期亦只有窄幅上落，於28200水平之上徘徊。今日期指結算，如無意外今年港股可以喺28000水平終結。不過明日半日市，後日又係假期，上星期五雖然完O左聖誕節假期開O左一日工，但假日情懷依舊濃厚，唔少缸邊友甚至外遊未返，估計呢兩日港股交投會較淡靜。 港股嚟到今年最後一個半交易日，好友喺12月佔盡上風，今日期指結算，睇嚟要喺28000樓上結算唔成問題。相對美股，港股其實落後得好緊要，不過呢個別股份一直跑贏大市，好似阿里巴巴(09988)同美團(03690)呢兩隻新經濟龍頭股，未來獲納入恒指成份股機會極高，有貨當然要坐定定，要無貨喺手，亦要吼位趁回調儲定貨，等待來年兩股染藍。 展望2020年，新經濟股佔恒指比重只會愈來愈高，而內地企業佔港股比重亦有增無減，持續增加，嚟緊上半年較為矚目嘅新經濟股，應該係有望於上半年來港上市嘅抖音。隨住港股愈嚟愈中企化，若然單睇本港經濟嚟判斷港股走勢，肯定錯到加零一，唔好再問本港經濟前景欠佳，連財爺同經濟局長都大叫頭痛嘅時候，點解港股仍然可以喺第四季重上二萬八水平。要確切掌握投資風向，投資港股時，應注意內地經濟情況，多於睇香港本地經濟發展。 內地股市喺今年完結前走勢轉佳，主要係有消息指人行短期內將降準，支持A股向上，所以古天后早於兩個星期前，已叫要吼住內地券商股。雖然人行降準對內銀股有一定刺激，不過古天后對內銀股有戒心，睇好內地股市，識買寧願買內地券商股。而內險股亦係另一選擇，除O左內險之餘，友邦(01299)喺內地進一步開放金融市場下，早着先鞭嘅友邦當然有優勢。 至於5G概念跟手機設備股，暫時諗唔到一個理由要放棄，睇嚟短期呢兩個板塊仍會以大漲小回模式向上推進。唔少人夠膽買落後股，對於強勢股反而無膽高追，其實喺投資市場永遠都係跟紅頂白，前輩曹仁超嘅金句係「有智慧不如趁勢」，幾時都係跟住大勢走，落後股非資金主流，何解要輸機會成本等運到咁蝕底。 古天后 (徐狄怡，證監會持牌人)