【头条独家】望抹甩空中瑜珈黑历史 细细粒搵健身教练狂操
2019-12-23 02:00 
早前细细粒（小宝）公开自己做空中瑜珈片段，由于太论尽令人睇得太开心太治愈，引起网民激烈讨论。不过，准备踏入新一年，细细粒决心洗底抹甩黑历史，搵埋健身教练Herman帮手操练，唔再成为大家笑柄。点知教练只安排了两个热身和4个基础教她，结果不单冇一个动作顺利完成，仲继续爆笑连场。睇嚟佢新一年想减肥，真系唔容易喎！撰文：杜淑霞 摄影：李维隆 场地提供：My Fitness 私人健身教练：Herman@lunl90
最初细细粒相当雄心壮志咁话：「新一年讲完就要做，我唔想做运动做到上次咁肉酸，我又要靓又要健康，所以请咗个教练嚟教我做运动。」教练Herman就话：「我预你会做两个热身动作，同埋4个好基础嘅动作，努力呀！」听到教练讲细细粒即时想褪軚，细细声话：「咁多咩？四加二？」教练再话：「一个钟做得晒㗎啦！」细细粒再面色一沉：「一个钟，我嘅地狱课程开始啦！」
做运动挂住食菠萝油
训练由两个热身动作开始，只系简单踢腿，细细粒已做得超吃力，做几吓仲话好攰，要教练扶住手先完成到。弯腰热身动作一样唔掂，搞到要爬住嚟做，相当夸张同爆笑。到正式做健身动作「弓步加举哑铃」，但由于细细粒踎唔到，教练改为叫佢坐住做，一样出事起唔到身。之后做「Bosu加开合跳」明明要用手臂力撑起上半身，但细细粒继续失败，教练示范正确姿势时佢仲话：「你嗰啲系肌肉，我嗰啲系肥肉，你用啲肌肉撑得起自己，我用啲肥肉又点撑得起自己呀！」继续到「炮筒训练」细细粒叫做到吓，到「KO8 push up」她再同啲健身器材陷于苦战。
不过最后教练都给了细细粒7分作鼓励，希望她继续努力练习。而细细粒就坦承自己唔锺意做运动，「真系可能第一次，我都想持之而行，一个月后可以似模似样，起码做push up可以离地1cm都好开心。（头先边个动作最难？）个个都咁难，我真系冇谂过连攞住哑铃坐喺度起身都起唔到，点解会咁样㗎？！其实呢，新年唔一定要减肥，增肥都得嘅，嚟紧潮流可能唔兴减肥，不如我带大家去食啲好味嘅菠萝油，头先冇力做运动可能未食，下次食埋可能有10分啦！」
最新回应