【头条独家】参加《造星II》博有转机 刘瑞祈视比赛为学习机会
2019-12-13 01:15 
《全民造星II》已选出了最后10强，周日（15日）将有冠军诞生。今次真人骚继续有不少熟口熟面参赛者，97号的Kay（刘瑞祈），其实早在16年以二人男子组合ReVe身份出道，不过未见成绩，加上队友年几前走埋，Kay决定参赛博一博，虽然20强止步，但他已觉超出预期，更认为是个非常好的学习机会，亦大大提升了知名度，他更睇好老死JJ（范卓言）可在比赛中夺冠。撰文：杜淑霞 摄影：李权威 场地：Alive Dance Studio
27岁的Kay当年跟陈子华（Cavan）组二人男子组合ReVe，到过台湾集训，可惜发展平平，年多前队友更决定离港发展，孤军作战的他在旧同事、上届《造星》参赛者阿神（曾赞学）鼓励下决定参赛，「队友走咗年几，真系唔知点打算，佢就话不如参加比赛可能系一个机会，佢自己都系参赛转变好大。」
唔顾歌手形象
不过，Kay坦承最初只望入到50强，「嗰时真系谂住做到几个表演，譬如唱到自己入行第一首歌，已经好满足㗎啦！真系冇谂到咁远，讲真愈耐愈发觉真系唔想离开呢个舞台，之后真系有谂过希望入到10强，但𠵱家入到20强都冇失望，不过比赛后节目要我讲感受，最初真系讲唔到嘢。」
Kay谓比赛令他成长了很多，「以前做歌手，咩都有公司照顾，今次我公司讲明唔会理我，比赛令我变得独立咗好多，又唔会成日顾住歌手身份同形象，以前自己有做模特儿嗰啲兼顾都唔敢同人讲，𠵱家反而唔会啦！」讲到对未来期望，他好希望有机会达成歌手梦外，还想跟老友阿神齐齐做主持，「我谂同佢合作应该会好开心，当然都想拍剧，但自己对演戏冇乜信心。」
最新回应