【头条戏场】《飞翔吧！埼玉》乱咁嚟抗争喜剧

2019-12-13 00:00

香港人好锺意去日本，咁你知唔知埼玉县喺边?有咩特产?吉祥物系咩?埼玉县位于东京嘅北方，每年票选「夏天最想前往」定「冬天最想前往」地区，无海嘅埼玉都系全日本47县中排行最尾。但讲到「最难居住的城市」同「女居民贫乳」票选就得冠军，而吉祥物系零知名度嘅埼玉鸠，特产就系日本周街都有嘅大蒽同米饼。导演玩谢埼玉人，但当地人无玻璃心，电影上映时，在埼玉县的票房更超越东京成为全国县份冠军，埼玉人加油。(刚上映)撰文:廖思慧

电影改篇自同名漫画，由擅于改编漫画的日本导演武内英树执导，将原著中埼玉被东京歧视的虚构世界搬上大银幕，视觉系歌手Gackt饰演隐藏埼玉人身份，去到东京起义的美少男转校生麻实丽，佢跟贵族学生会长，由二阶堂富美反串饰演「伪娘」坛浦百美有一段可歌可泣嘅BL情。

不正常反抗手册
咁究竟套戏讲乜?讲述饱受东京欺凌的埼玉人不堪羞辱，决心组织「埼玉解放阵线」揭开革命的序幕。埼玉县落后如蛮荒地，当地人有「埼玉菌」，传闻系致命病毒，但无人求证过。埼玉人要进入高尚嘅东京必须申请通行证，美男子麻实丽誓要撤销通关制度，光复埼玉。套戏好癫，演员化妆同装扮如睇紧宝冢歌舞剧团，剧情黐线，将歧视同身份认同嘅严肃问题搞笑地表达，导演完美地演绎认真地乱咁嚟嘅风格，好笑嘅，呢类癫嘢真系日本导演先拍得到。