【头条独家】婚后极忙 新剧煞科即补偿 陈山聪带怕丑老婆撑枱脚

今年11月1日，43岁的陈山聪跟拍拖6年的40岁圈外女友Apple结婚，婚后唞咗几日就要开工赶拍新剧《大步走》，由朝拍到晚，山聪话，「每一日都系收工喺张床先见到老婆，会趁休息多啲时间陪佢。」讲就易，莫讲话「造人」大计，新婚人夫连瞓都无乜时间。近日新剧终于煞科，同陈炜去完内地乌镇商演嘅山聪即刻交人，带老婆去「米芝莲指南」推介嘅铜锣湾西苑食饭，见到记者嘅山聪话:「啱啱返香港，同老婆撑枱脚。」陈生甜甜笑，但陈太就超怕羞，全程拧歪面避镜头，好搞笑。采访:李权威、李维隆

明年1月举行的《万千星辉颁奖典礼2019》，视帝之争相当激烈，除了《白色强人》拍档郭晋安同马国明，还有话题剧《金宵大厦》的陈山聪及《解决师》的王浩信等，唔少网民力推在《金宵大厦》中饰保安员「阿萧」的山聪做视帝。对被网民推举，山聪曾笑言：「唔系有冇信心问题，系仲未有资格攞奖，仲有好大好大进步空间，继续努力啦。」

努力实行造人大计
结咗婚，剧集又有好成绩，完全洗底的山聪好感恩，佢仲好想快啲做爸爸，仲话好恨生女。上月尾，山聪终于拍完剧，今年拍咗三套剧嘅山聪觉得体力透支，会放假休养身体，问到会否全力开工「造人」。陈山聪笑说：「样样都系，顺其自然，做乜嘢都需要活力。结婚之后日日开工拍剧，每一日都系收工喺张床先见到老婆，会趁休息多啲时间陪佢。」他计划明年与老婆到意大利的小岛度蜜月。

陈太好怕羞避镜头
今个月尾，山聪又会同李施嬅、马德钟到美国登台，新年亦会再同陈炜到外地登台，努力搵真银。刚同陈炜去完内地乌镇商演嘅山聪一得闲即补偿，拖老婆去铜锣湾撑枱脚，据目击食客透露，两人食得唔多，但全是酒家驰名食品，如叉烧及花胶汤，又食又倾个几钟就埋单，陈太先步出，一见记者即返转头搵老公，其间见到老板娘，两公婆即寒暄数句，明显系熟客。山聪见到记者有礼挥手，表示「啱啱返香港，同老婆出嚟撑枱脚。」陈太好怕羞，一直避镜头，就算入到电梯都一样背住记者面壁，极之怕镜头。