【头条独家】主动送名牌包包 陆浩明宠坏女友做「港女」
2019-11-27 22:12 
好多人话靓仔冇本心，所以唔系靓仔陆浩明(6号)，但胜在对女友温柔体贴就好有市场，6号好叻叻猪咁媾到个仙气模特儿女友陈诗欣（Ayan)，当然钖她钖到燶，仲将女友宠成「港女」，主动送上名牌包包畀女友做生日礼物。
喺上周嘅一个悠闲下午，6号同现身铜锣湾时代广场一间C字品牌名店快闪买包包，记者直击见6号早有准备，到场后便向职员展示已订好的包包图片，随后即取货，由6号埋单，好快就拖实一脸满足，拎住战利品嘅陈诗欣离开。所见6号送畀女友嘅黑色小手袋约值2万蚊，因为方便放小量化妆品及手机出街，属星级热卖款，岑丽香、刘嘉玲等都系用家。
6号坦言系补送畀女友10月19日嘅生日小礼物：「因为之前我哋去咗葡萄牙旅行，加上嗰时工作好忙来不及买礼物，直至最近市道唔多好比较得闲，马上订货再带佢去拎货。(唔系已请咗佢去生日旅行咩？)女人当然喜爱包包，佢锺意呢个品牌，其实佢唔想我使咁多钱，成日叫我唔好买，咁一年都只得生日同情人节送礼物啫，冇所谓啦，我咁辛苦做嘢都系想佢舒服啫。而我生日时佢都有送返嘢畀我，不过系自制手工嘢居多，好似今年4月我生日时一齐去咗越南，佢带埋DIY玻璃瓶礼物送我惊喜，除此之外，仲加马送多部手机。基本上年年都会有生日trip，去年同佢去咗希腊，我哋Keep住甜。哈！好彩佢生日早过TVB台庆一个月，否则我唔做台庆都要陪佢过呀。」问到几时送戒指时？6号则带有暗示说：「咁就要留意我嘅社交网站啦，但我未搵到合适求婚指环。」
最新回应