【头条独家】女友庄思明开口等嫁 杨明拍陈晓华唔敢亲热

在《婚姻合伙人》中首当男一的杨明，早前再下一城在王伟仁监制TVB新剧《网络骗案》中继续担大旗。日前，他跟前港姐冠军陈晓华（Hera）及朱敏瀚(Brian) 拍摄新剧外景，就算跟美貎兴智慧并重的靓女Hera合作兼有感情线，杨明似乎怕「未来老婆」庄思明呷醋，唔敢同Hera有亲热戏。 采访：方骞平 摄影：李维隆

当晚三人在火炭工厂区拍《网络骗案》通宵戏，剧情讲朱敏瀚醉酒驾驶撞车，杨明就车住朋友未婚妻Hera去寻人，点知中途目击交通意外，Brian的车左摇右摆后，撞到反转兼发生大爆炸。睇见未婚夫Brian葬身火海，Hera伤心跪地痛哭，要由杨明扶住加以安慰。

赞对手靓女又好戏
不过，当晚飞车危险场口由特技人替身上阵，Brian只补拍一些扭軚镜头配合。杨明轻轻松松就收工，他风骚地说：「呢场戏对Hera角色相当重要，拍足成晚，连睇Play back仲喊紧去keep住情绪，好有戏。但我只系做司机啫。」问他作为前辈可有指导Hera拍好处女剧？他即谦虚说：「又唔可以讲系教，只系将我廿年嘅经验讲出嚟，佢都有创新嘢教返我，同埋佢唔只靓女，演戏都好有天份。」

对于女友庄思明扬言3年内嫁，38岁杨明现正努力搵「老婆本」，除咗剧接剧，最近开埋第3间炖汤店，好进取。不过，连续几个月都蚀住做，他说：「除咗茘枝角店业主肯减两成租外，天后同湾仔店企硬唔减。𠵱家少咗3至4成生意，唯有守业，我都冇裁员、减薪及逼员工放冇薪假期，自己周不时落去吸客罗。(女友有冇安抚呀？)唔使啦！做生意系咁，实有高低，呢个环境大家都唔想。」