阿碌开咪｜担凳仔睇辩论

上周《星岛》国际版头条，小弟一睇，先窒一窒，继而心中暗笑，因标题为：《星洲邀布兰森辩论毒品死刑》。

背景是新加坡4月处决一名2009年走私44克海洛英入狮城的马来西亚毒贩，此事震动联合国及欧盟，认为判刑太过严重。

此时，英国维珍航空大老板布兰森（Richard Branson）趁10月10日「世界反对死刑日」，高调公开抨击新加坡，不但滥判一个「患有智力障碍者」死刑，兼且力指这国家针对毒品的判刑及将毒贩判死刑，是「站在历史错误」的一边！

当中令新加坡最馨的一句，为指此国近月意气风发，经济实力急升之际，同期执行死刑的频率也日益急升，实属新加坡声誉的污点！哗！好重口喎。星政府觉得自己声誉日隆，国际地位日高，你竟来「泼红油」？

本来若布兰森为Nobody，星政府真系睬佢都儍。问题在佢身分显赫，所有言论西方媒体都引述。如今再加埋欧盟及联合国都出埋声，呢铺点下台呢？有损国家形象喎。

终于星政府出手了，但我睇，真系蠢过只猪。因竟公开挑战布兰森「只揪」，上电视直播辩论，睇睇究竟边个更有道理。

其律政部长尚穆根更上晒头「大」老布，公开揶揄：「新加坡畀埋来回机票及酒店你到此与我辩论！睇睇你又点可以证明我哋做法是错的，唔该顺便解释一下为乜新加坡要废除令人民深受痛苦的毒品法例？够姜就接招！」

哗，呢个尚穆根讲到咁「大」，有啲险喎。因布兰森著名乜都敢，今次更有机会扬威国际，睇嚟极可能接战。尤其初步睇，尚穆根完全唔同班数，兼又意气用事，冲动到大骂英国乃十九世纪卖鸦片的国家，有乜权对亚洲国家指指点点？

我一于买定花生啤酒，担凳仔睇呢场辩论。因单单由毒品定义（例如大麻）被多国推翻开始砌，到毒贩使唔使死，都有百花齐放论点㗎！

曾智华

阿碌开咪

 

编按原题为「输咗好大镬㗎喎」