阿碌开咪｜CommonSense防骗

新闻报道，日日都见到N种骗案，各界有齐，包括：投资、美容、减肥、壮阳、生发、爱情、旅游、赌博……　

世事常变，但骗术则万变不离其宗。骗子一定出现在有钱的地方，所以，有钱就有骗子。而骗子能够成功，因懂得心理学ABC，掌握只要能攻陷对象的贪婪及无知两大人性弱点，就会成功。大有大呃，细有细呃。

我这一辈，不少是街童出身，童年到青年穷到燶，故此，绝少成为骗徒对象。不过，基于通街荡，倒见尽街头骗术，尤其在庙街、大笪地及旧街市，最多低教育水平街坊出现的地方，就有五光十色骗术畀你「参观」。

当年我最喜欢研究睇相佬、风水佬、假药佬、色情佬（O氹人买咸野或上架步）、假货佬、鱼虾蟹佬……点呃人。睇穿后，对日后保护自己，有莫大裨益。

其实说穿了，大部分骗术都可以用Common Sense防范。只要你脑筋清醒，揿住自己的贪念，再自问一些基本问题就掂。例如：一、有冇咁大只蛤乸随街跳？二、会有低风险高回报投资嘅咩？三、股票肯定年年有八厘回报再加升值？咁，银行为乜要低息贷款畀人赚鸡碎咁多差价啊？四、我成七十岁人有机会回复十七岁的性能力？五、我个秃头有机会再天然生发变又浓又密？六、阿姐我七十岁仲有机会玩「升胸奇遇记」而自然到冇人发觉？七、我靠不停整容可以回复青春？八、有工作会毋须学历及经验而有百万元年薪的？九、有减肥法可以不做运动一个星期减十磅而唔伤身，任食，不会Rebound的？

几年前我不停在专栏大声疾呼，叫大家千祈咪信虚拟货币，因摆明骗局，一旦爆煲，必尸横遍野。唉……终于近日成真，比特币固然跌到喊阿妈，更大镬为「稳定币」TerraUSD及Luna币，更宣布归零。

以上其实全部用下Common Sense略作思考，都唔应该中招！

曾智华

阿碌开咪