阿碌开咪｜行人头，跟鬼尾

上周染疫，被逼闭关，有乜好做？多咯，睇报章、上网、玩手机、写稿、煲剧……

另外，每餐在写字枱食，前面放部iPad，扫呀扫，在几百条片中选有兴趣的。

近期对睇政治KOL的兴趣大减，可能个个立场太鲜明，佢未开口，我已知佢想讲乜、会点讲，吸引力自然略降。另外，不少又非常负能量，总之就系狂骂，日日骂，大佬，食饭时间，好恶顶㗎。唯有用手指一笃，飞走佢，以免眼睛食辣椒。

前晚又睇，扫呀扫呀扫，咦，好面善喎，哦……原来昔日中小学同学仔谢天赐（前港联航空行政总裁），正与香港历史学权威丁新豹教授，开讲——甘棠第的前半生。

头头以为两位讲埋啲八股嘢加历史建筑，肯定Out到爆喇，有乜鬼好听喎。点知，错！与谢天赐（Andrew）七年同学，从来唔知原来佢讲故事咁有节奏感。将自己的身世、家族发展史、大量混血儿在香港出生原因，以至挣扎求存及矛盾心态等等，娓娓道来，令我「吃」了一顿极丰富的晚餐！

佢也近七十岁了，乃香港鼎鼎大名何东的家族后人，原属荷兰籍犹太人，本非姓何，但因来自荷兰，加上姓氏为Bosman，于是就直译成「何」也。

初初与谢天赐同校时（圣若瑟书院有白种人、印度人、西洋人——中欧混血、星马人……），觉得佢个样鬼鬼哋，竟可讲纯正广东话，奇在与白人鬼仔又冇乜交往，唔知点解。

终于，我三十年后访问何鸿燊（佢上一代）才知道，原来在香港做「西洋仔」，真系两头唔到岸。中国人唔系中国人，英国（欧洲）人又唔系，夹在中间，满不是味儿，不时也觉被白种人歧视。

所以，呢类香港混血儿，变自成一族，为争一啖气，相当勤奋。结果，出了不少名人，何东家族外，马圈天王告东尼也是佼佼者。

谢天赐指佢哋在港境况——行人头、跟鬼尾。人即中国人，鬼即英国人……大家自己意会点解啦。

曾智华

阿碌开咪