阿碌开咪｜快搞「震脑俱乐部」

任何一家公司、一个机构、一个城市、一个国家，要发展，要前进，其中一项必备元素——创意。不过，并非口噏噏封个官做「创意XX局」就等于有，必定要由上而下，由下而上，皆知道乜叫创新思维。

小弟做咗三十几年公务员，绝对清楚官场文化，多数唔想孭，怕濑野。举世皆如此，做官，一定先自保，反正做又三十六，唔做又三十六，你多多事试呢样、试嗰样，出咗事上司会唔会揽你？官场「老是佛」上司最叻划清界綫。因个个就快够钟咬粮，又点会喜欢「搞搞震冇帮衬」下属？

当年曾荫权做特首，一再强调公务员要——Think Out of The Box！仲出埋MEMO指示。

不过，一去到各大部门，小弟就听到「杂音」：「喂，处长支唔支持先？Out of The Box之后领野点搞？畀老细揼时搵『煲呔』申诉乎？」

好嘞，如今新政府开波，会否大刀阔斧改变层层官僚自保文化呢？且看超哥了。

前晚与一退休顶级高官T叔晚饭，佢最支持创意，在任时已经常请具反斗思维的年轻IT人饮酒乱噏「震脑」（Brain Storm）。如今，T叔虽已退下，也年过七十，但脑筋仍非常灵活，创意澎湃，例如认为：「港珠澳大桥乃最佳无人驾驶实验场。因一条直路，唔使又停又开，尤其疫情时，可以防感染而运送大量货物，几正？如今中国的电动车技术，已去到世界顶级，唔用，实在太浪费。条桥也如是，为乜唔用尽？」

单单讲一个意念，已知T叔对港人港事仍非常上心，可惜已经不在位矣。

小弟同佢有个共同概念。新政府应立即搞个「脑震荡俱乐部」（类似中央政策组），网罗脑筋灵活创意澎湃年轻专业人，齐齐在无拘无束无官方身分下，揸杯啤酒任噏，就改善香港出谋献策。佢哋可以斋讲唔使做，冇心理包袱下，必定爆出N咁多靓「桥」，慢慢可逐一变成新思维政策。

曾智华

阿碌开咪