阿碌开咪｜梅老点解唔怕烦

上周五睇《星岛日报》，揭呀揭，揭到国际版，睇见标题，不期然冲口而出：「哗，九十岁都仲得？唔系啩？」

乜事？正是当日大字标题——《91岁梅铎四度离婚，与超模结束6年情》。

仲得，不但讲性能力，更重要，仲可以唔怕烦，重新再搞一次离婚的法律及财产分配程序。

以前读过一本生理学书，当中指出，凡做大领袖的男性，无论在哪个领域，必有极强征服欲，同时性欲也超强。所以，有很多恋情及婚姻关系。系真唔系真？大家可由历史人物到自己身边人物印证，就知有几坚了。

最近大家都读到汤告鲁斯有几多段情啦，佢正是典型的「电影界领袖」，充满征服欲。

讲返梅铎，千几亿身家，兼且贵为全球传媒大亨，达官贵人个个怕咗佢，自然N咁多人巴结，包括不少怀着各式动机的女人。

老友，其他街边阿公八十几岁，搵鬼吼咩！但梅老不同，异性慕名或者好奇黐埋去肯定不少。所以，就可以有一个一个又一个！

N年前第一次与空姐结婚，玩唔长。最长第二段婚姻，妻子是女记者，玩足三十多年才散档。两段婚姻后，仍未烦够！第三段是众所周知的「巴辣妹」邓文迪。短短五年，又散，时为二○一六年，当时佢已八十开外，一般正常男性，多已眼蒙耳聋身缩背曲，乜器官都唔掂啦吓嘛？

哈哈，你咪理，佢竟又立即再恋爱，今次更劲，竟搞上滚石乐队灵魂米积加（Mick Jagger）拍拖二十二年的女友、前超模霍尔（Jenny Hall）。此女有名为社交蝴蝶，又挞得着，犀利。结果，两人二○一六年在伦敦一所教堂正式结为夫妇。

今次，玩咗六年再散Band。

小弟结一次婚，已深觉由恋爱到筹备婚礼再到生儿育女，然后全家互相适应，乃一非常大「工程」。真系玩一次，人都残，乜都够。

呢丁梅老，玩足四次，分分钟可能再有第五次，究竟是否有点「变态」呢？

曾智华

阿碌开咪