乐●活｜文具控必收好物

终于有时间同大家分享最近买到嘅好物！Laurie自问系一个文具控，虽然相比以前而家返工做嘢都系用电脑、手机为主，文具特别系纸笔真系畀以前用少咗好多，但依然改不了锺意行文具店，发掘新文具嘅习惯。

向来日本三菱铅笔（Mitsubishi Pencil）都系其中一个入手颇多嘅品牌，之前最爱系品牌嘅JetStream系列，出墨流畅，而且写喺唔同质地、厚度嘅纸上一样顺滑，而且其墨液具防水及防变色，且书写后，墨液立即变乾，唔会整花或者整污糟。

最近，就对Uniball One系列愈来愈锺情，特别系佢愈出愈多色，令Laurie忍唔住想储齐佢！最初，认识呢个系列嘅笔，主要系畀佢简约嘅外表吸引，而且仲有唔同颜色嘅笔杆，以及有0.38mm同0.5mm綫幅可以拣，于是拎起一试，唔单止颜色吸引，而且写字嘅时候非常顺滑。

One系列除咗有单支装之外，仲推出唔同主题、配色嘅3色盒装。好似《Weekend》系列就有《Friday Night》、《Saturday Morning》及《Sunday Evening》，每盒分别会系2款限量色及1款恒常色，其中限量色嘅配色分别系荧光绿色和凌晨紫色、晴天蓝色和棕榈绿色，以及暮色紫色和鸡尾酒橙色，至于恒常色就包括粉红色、黄色和浅粉红色。Laurie觉得呢个主题嘅颜色，最啱就系有写开手帐，或者平时锺意画公仔嘅朋友，既有淡淡然嘅淡橙色，又有清新光亮嘅晴天蓝色，仲有低调嘅凌晨紫色，最啱就用嚟以文字或图画，配上唔同颜色去记下心情。

充满复古味、偏向柔和色调嘅《Classical World》系列就有多款Laurie锺情嘅颜色。同样系有3个唔同主题嘅3色盒装，分别有《美国餐厅》嘅苹果口香糖色、古董绿色汽车色及牛仔布蓝色；《法国复古》就有桃味甜点色、米色玫瑰色及蓝领带色；《高领摩登》就系焦糖色、紫罗兰色及玉露茶色组合而成。呢个系列同样都有0.38mm同0.5mm单支装出售，私心推介要入手牛仔布蓝色同玉露茶色。

特别一提，One系列嘅黑色亦系必买之选，因为所用嘅黑色墨液系与别不同，墨液浓，就算喺黑色纸上写，都可以清晰显示之馀，重要见到写出嚟嘅字系黑色，而非其他黑笔写在黑纸上变成红色或啡色嘅感觉。

之前睇三菱铅笔嘅IG（@mitsubishipencilhk ）发现原来唔少本地插画家会用One系列嚟创作，大家都可以向插画家们偷师，或者攞吓灵感，点样将One 系列用喺唔同地方。

讲开三菱铅笔一定要讲埋今年喺日本杂志文房具大赏2022铅芯笔界别获得第一嘅Uni Switch Kuru Toga x Alpha-Gel。先分享揸上手嘅感觉，笔杆手握位用上Alpha-Gel，手感舒适之馀，仲可以卸走书写时嘅力度，写得耐都唔怕手攰，翻查资料先知原来呢种物料平时系用于鞋内卸力，所以用喺笔杆手握位上就可以达到卸力嘅功效。

之前睇三菱铅笔嘅IG（@mitsubishipencilhk ）发现原来唔少本地插画家会用One系列嚟创作，大家都可以向插画家们偷师，或者攞吓灵感，点样将One 系列用喺唔同地方。

有时候好怕写出嚟嘅字綫幅时粗时幼，虽然唔会影响阅读，但总系觉得有啲碍眼！呢支得奖作嘅另一卖点就可以完美解决呢个问题，因为佢用咗三菱专属机芯Kuru Toga，可以做到一边写一边自动旋转，写出嚟嘅笔綫幅一致又够尖锐嘅字。最吸引嘅系仲有Hold Mode内置功能，即系可因应使用需要将Kuru Toga自转功能开画关，用家就可随意转换粗幼笔綫幅，一支笔就可满足画图、写稿嘅需要，而Uni Switch 仲有0.3mm同0.5mm可以选择。

 

如果锺情Kuru Toga嘅技术，仲可以考虑入手Advance。外在看起简约嘅Advance内置嘅专利自转机芯比普通Kuru Toga版本转快两倍，可以令笔尖端更细致更尖锐，而且因为Advance笔尖有金属物料，令到笔嘅重量比普通版稍重，但亦都因为笔尖重咗，令佢嘅重心低咗，写字嘅时候手感就更稳定。呢支笔另一细心位系可以将笔嘴可收回笔中，加强防折断功能。Advance备有0.5mm或 0.3mm可选，更有冰蓝色、Latte 咖啡色、香芋粉紫色同车厘子红色等限量版笔杆可以选择。

作者：Laurie Wu（爱保健爱旅游爱购物的熟女）
[email protected]