​​​​​​​阿碌开咪｜开盘开到嘭嘭声

立法会选举之后，先而圣诞，后而团年，快乐聚餐一场又一场而来。聚首人物，包括政界、官界、传媒界、专业界（律师大多）及商界众老友。

　　呢种场合，当然唔会讲冇瘾野，费事大家扫兴。所以，一定要搵人人有兴趣的Common Interest话题。咁，个个可以踊跃发言，大喷口水，但又唔使负责。

　　讲乜呢？最受欢迎正是绝大部分人都冇得决定（包括游戏规则及人选！），但又可以议论纷纷的——下届特首之战（有冇战？）及人选。

　　一讲此话题，个个都认秘闻专家及分析专家，总有自己的看法及「坚料」（定流料？）。

　　特首之战，至今只剩三个几月。如此重要一场选举，仍乜细节、乜人选都未浮上水面。真系唔知乜葫芦卖乜药？

　　唔紧要，咁仲好玩，先来一场牙骹战，几乎所有饭局都开盘（其实搵定藉口下餐又食食食！）。

　　盘路众多，包括：

　　一、林郑月娥唔争取连任；二、林郑月娥报名争取连任；三、下届特首冇「战」，因采取澳门模式，一只马入闸，一只马跑，人人只可买一只马；四、多过一只马跑，甚至似过渡期第一次选特首有多只参赛。既已肯定只只「爱国爱港」，咁就边只跑出中央都应该放心！

　　四个盘，个个都有极大争拗。

不过，小弟观察，似乎喷口水的都只是以个人喜好及倾向分析，客观成分甚低也。

　　四个盘，以第一及第二两个最冇共识。即有一半人坚持林郑虽唔表态，但观乎佢的民望与阿爷迟迟唔出声，可能暗示应「知难而退」，自动返屋企享天伦乐。

　　但另一半人则自认了解林郑性格，唔输得。第一届「搞成咁」，肯定唔忿，誓要争取连任，在一切「完善」后，管治变易事，施政应有大作为。

　　至于第三项，多数认为唔会嘞。因如今政治安全系数百分之百，冇乜风险。故此，扮下有得选较合民情及国家体面。

　　第四项呢？多过两只入闸？除非阿爷想烦啦，怕且唔会嘞！

曾智华
阿碌开咪