【阿碌开咪】行为、身分、时空

最近听咗一次个人形象公关分享会，讲者所述的，颇引起我共鸣，也望政府高官们有所警惕。

佢讲乜？正是：行为、身分、时空。

以前小弟负责管香港电台第二台，旗下颇多知名度甚高、形象极好的年轻人偶像DJ，个别对外好似好醒，其实有点「猪头炳」，因入世未深，周不时闯祸，就要我补镬。

责任必须负，因佢哋有问题，即我有问题，唔解决唔得。于是，不时要轮流召见，或分析，或训斥。目的只有一个——形象止蚀（Control Damage）。

通常DJ出问题，被报章大肆批评或被投诉，基于抗拒心态，会一于死顶。

例如回应：一、我又唔系犯法，点解人人做得，我唔做得？二、我咪前/幕前系公众人物，咪后/幕后点解唔可以做返个普通人？三、我做嘅时候，又唔系当班，为乜唔可以做？

事实当不少公职人员犯上形象灾难时，佢自己甚或想为佢开脱的老友，都会用上以上三点去辩驳，觉得冇乜大不了，既然不是犯法，毋须大惊小怪地去处理。

试过上世纪九十年代时，有一位偶像DJ公开做出与公众形象不相符的事，被娱乐版揶揄。当我在房内向佢指出问题时，反应也是愤愤不平，又用以上三点做挡箭牌。

小弟当然不会用闹来达致目的，只以引导性问题令佢开窍。

一、咬口烟到外围投注站买马，绝对合法行为，但若你见到高官、校长咁做，觉得有问题吗？（当然有！）点解？（与公众形象不相符！）咪系罗，同合唔合法冇关㗎！

二、高官、校长、神父，工作时，当然有个令人尊崇形象。放工后，可否穿橡筋短裤拖鞋，踎在投注站门口刨马经，做个「普通人」？（答：唔应该！）咪系罗，又系同个人自由及犯唔犯法冇关㗎！

三、控烟办官员，放工后，可否大模斯样在公众地方吸烟呢？（答：可，但不应。因无论任何时候，都不应做与身分违背的事！）

讲完，佢明白晒！

曾智华

阿碌开咪