容海恩與陳家珮齊抱B茶聚 不忘爭取港府一次性奶粉津貼

新民黨立法會議員容海恩（Eunice）最近有弄瓦之喜！Eunice今日就同早前同樣生咗第二胎的黨友、南區區議員陳家珮齊齊同傳媒茶聚，話要介紹兩人的千金俾大家認識，Eunice千金昌蔚唔驚唔覺已經出世3個月，而家珮的千金Hannah就已經4個月大。Eunice就話，而家昌蔚已有7公斤重，成個肥妹仔咁，個樣就似足老公袁彌昌，仲大爆老公最近晚晚一路睇歐聯一路餵奶！

兩個媽媽同BB難得聚頭，當然就好多野傾，雙方仲極有心意安排咗禮物交換環節添！一開始Eunice母女就親子檔就先為家珮獻上表演，Eunice就播出交響曲，讓昌蔚指揮舞動。家珮就送上本地品牌的嬰兒食品予Eunice，同時又送上玩具琴一部，直言該琴唔單止可以學音樂，亦可以學習鍵盤上的不同顏色，豈料此時Eunice就突然爆出一句「千祈唔好識黃色就得啦，其他都要識」，唔知當中有咩含意呢？Eunice則有送上毛巾作為回禮。

做咗媽媽的兩位政界女士當然更關心育嬰議題。Eunice就話而家奶粉錢貴，最平都要二、三百蚊罐，期望港府給予一次性、每位嬰兒兩萬元的奶粉津貼，幫輕家庭負擔。家珮則指出，現時託兒服務需求殷切，期望港府加大支援。