翻10年前「舊帳」寸軒仔 祖兒：由面無四両肉邁向方形腰

歌手容祖兒今年入行20年，即將在紅館舉行18場演唱會。她今日在ig轉載一條10年前張敬軒（軒仔）祝賀她入行10周年的短片，當時軒仔表示：「喂容祖兒，有無見到你自己呀？話咁快就十年喇，你又邁向auntie級既artist喇。喺度要恭喜你繼續成為天后。我都希望可以成為天王，希望你可以支持吓我，希望大家繼續支持祖兒。」

容祖兒今日留言「反擊」：「喂山寨版Justin Barbie，有無見到你自己呀，係呀話咁快就廿年喟，你由面無四両肉邁向方形腰啦，喺度要恭喜你啦，因為係咁你已經成為香港嘅天后喇。希望你可以停止再食糖水（拍廣告當日我親眼目睹佢鯨呑兩大碗椰王燉桃膠，連我本來嗰碗都食埋），不過無論點都好，希望所有人都繼續鍾意支持肥軒，因為佢真係好抵錫，我覺得光榮因有佢擁戴。」

而張敬軒也在帖文中，留下象徵粵語諧音的兩個英文字母的留言，引起粉絲議論紛紛。