張敬軒馬國演唱會抱恙上陣 「粉絲力量」助開聲
2019-05-03 21:30 
張敬軒日前於馬來西亞雲頂舉行「Hinsideout」演唱會全場爆滿。為照顧馬來西亞的歌迷，軒仔特別安排一套新歌衫，而且歌單上的歌曲亦稍作調整，加插了一些國語歌，如《過雲雨》、《想你想得好孤寂》等，十分貼心。
演唱會上，軒仔換上多套靚衫，又唱又跳十分賣力，台下歌迷亦非常熱情，幾乎由開場嗌到完場。期間有歌迷向住軒仔大叫：「你好靚仔呀！」軒仔笑回：「多謝你哋日行一善。」全場爆笑。
兩小時的演唱會中，軒仔施盡混身解數，但原來他剛抵埗馬來西亞就病倒，他在台上表示：「呢件事我覺得實在太奇妙！所以想同大家分享。我落機時突然間覺得喉嚨痛痛哋，第二朝瞓醒就冇咗把聲，喺酒店房好徬徨，因為作為一個歌手冇咗把聲，而第二晚就要開show，冇聲點算呢？」佢話主辦單位好貼心，擺咗暖水等各種「醫療設備」喺佢房，「我都不斷祈禱，今晚開得番聲唱歌。當然好大部份力量係嚟自你哋（觀眾），謝謝大家！」
第一次encore，軒仔唱出《斷點》、《Hurt So Bad》、《只是太愛你》及《餘震》等經典歌曲，唱完《My Way》後，演唱會結束，不過場館雖然爆燈，但一眾歌迷依然唔肯走繼續大叫encore，於是軒仔再次出場，唱出《愛情無關是非》及《煙雨斜陽》，兩次encore後演唱會圓滿結束。
關鍵字
最新回應