【維港會】牛頭馬面危站懸崖教登山安全 網民：搶晒任何仁鏡

近年本港發生多宗行山意外被困、受傷甚至死亡個案，消防處吉祥物任何仁今次連同陰間神祇的牛頭馬面出動，提醒市民登山遠足安全。不過任何仁的風頭似乎被搶走，但網民紛紛將焦點放到「牛生」、「馬生」身上。

消防處在Facebook專頁上上載圖片，教路「任何仁行山。一定唔會行近高危位置 。 仲會特別留意警告牌嘅提示。 行得正，企得正，影得靚 。」消防處又提醒，「事先計劃好路線；留意天氣變化；帶充足裝備；揀有明確路標嘅山徑 ；留意警告指示牌；唔好亂抄小徑自行開路 ；唔好亂闖密林山澗懸崖；唔好攀爬峭壁；勿做獨行俠 」

不過網民焦點就落在向任何仁招手「牛生」、「馬生」身上，戲稱「牛生，馬生你哋都返入嚟先，好危險」、「如果唔聽話行出去，牛生馬生會接你，7日後先帶你返屋企」、「山腳有羅蘭姐，茶水站有孟婆湯」、 「好明顯呢張相任何仁已經跌死咗，係牛馬生企喺入面叫返佢魂魄由崖下番返上嚟」、「都話郊外既牛係人扮架啦」。連漁護署的B仔都加入抽水，「安全行山要著合適嘅衫褲鞋襪呀！包住哂就任何仁都唔怕曬傷！」