赴尼日利亞拍攝要軍警荷槍保護 陳貝兒：彷佛一出街可能遇到意外

無線節目《嫁到這世界邊端》再度添食，主持陳貝兒近日與攝製隊出發到尼日利亞，為第3輯節目進行採訪拍攝。過去都被港女人妻故事感動落淚的貝兒，今趟似乎「嚇破膽」多於感動，她在社交平台發帖分享，日前接獲當地港女人妻告知，其寓所附近發生4屍命案，屍體更被斬件示眾，直言「呢邊各樣情況都真係比我預期嘅更困難」、「拍攝過程好嚴竣」，貝兒與攝製隊更需要荷槍實彈的軍裝警員24小時保護。

貝兒表示：「被提醒過好多次千祈千祈唔可以一個人出街、特別係入夜後。真係有咁危險嗎？一落機，嫁到尼日利亞嘅港女人妻就話早兩日佢屋企附近發生左單4屍命案，屍體更被斬件示眾。原因就只係為左一啲小糾紛。到埗幾日，呢邊各樣情況都真係比我預期嘅更困難。被提醒連刷牙都唔好用水龍頭水，要用樽裝水⋯⋯ 然後又會隨時斷水斷電。拍攝過程好嚴竣，尋晚我地夜晚10:30pm 收工返到酒店，然後好快收拾一下行李，凌晨03:30am 又要再出車坐 7個鐘車入尼日利亞東部地區拍攝。剛剛出車前又再被人妻提醒唔可以喺車上面玩電話，因為天仲係黑嘅，外面嘅人見到入邊有電話燈會知道入面係有電話嘅『有錢人』，同埋啲電話燈會照到我哋係外國人，佢咃就會唔知想對我哋做啲咩⋯⋯。而我哋要天未光晨咁早出發係因為想避開怕路上可能會遇到嘅意外。」

貝兒形容，「呢度彷佛係一個一出街就可能會遇到意外嘅國度。每日都要好小心。好難想像有港女會肯嫁到過黎呢度。做乜要嫁到咁遠呢？#放心 #我哋有荷槍實彈嘅軍裝警員24小時保護」。