【維港會】斥馬迷快餐店一人霸四位 食客影相公審惹討論

不少快餐店都不設用餐時限，吸引不少食客長坐「過日晨」，但同時引起討論。日前有網民發現有馬迷在連鎖快餐店，疑似一人霸四個位「刨馬經」，指他行為自私，將事件放上網，但反惹來網民批評他公審。

該名網民日前於Facebook群組「Tai Po 大埔」發帖，指一名中年男子在麥當勞獨霸四人座位來賭馬，批評他的行為自私，「呢個x街一個人霸四個位，零消費喺度賭馬 ，仲拎咗三隻紙杯裝水。將啲污糟吐左口水嘅紙巾亂咁放喺張櫈度，已經同餐廳經理講叫佢走。」並聲稱已向經理投訴。

事主未有交代中年漢最終有否被職員趕走，但引起網民熱論，有網民認為該中年男子自私，「典型算死草自私香港人」、「歸根係自律問題」。亦有網民認為不應未審先判，「你又知佢沒幫襯？可能一早收走咗呢」、「你埋去睇下佢係咪唔俾你坐先好話人霸四個位啦」。