陳國峰處男個唱激動哽咽

陳國峰首個音樂會《Penny 1st Live 2019》昨晚於麥花臣場館舉行，林盛斌、梁競徽、范振鋒、王梓軒、羅敏莊、吳業坤及謝東閔台上力撐好友，而李佳芯、高海寧、鄧佩儀、張振朗及羅孝勇等於台下支持。陳國峰為演唱會錄新歌《大器未成》，他透露新歌由兩位好友為他創作，歌詞一字一句都非常到肉，每每唱到歌曲尾段都會哽咽沒法唱下去。到了正式唱的時候，亦一如他所說數度落淚。

完場接受訪問時，陳國峰表示於沒有唱片公司支持下仍能開個唱感到非常感恩，感激一眾好友支持。他坦言真的很喜歡唱歌，成功開個唱是一個里程碑。談到多次感觸落淚，他笑說：「我唱畀父母聽嗰個環節，我綵排嘅時候直頭唱唔到，剛剛已經算唔錯。我由細到大都好似無咩成就，當然父母無介意過，而今次亦算係一個小成就。」問到何時再開第二次個唱？他笑說：「真係答你唔到，我估兩年後。（最希望簽唱片公司？）呢個已經唔強求，有當然係最好。」