好友蝦頭主演新歌MV 鄧小巧想起家人感動落淚

歌手鄧小巧因歌聲觸動人心，被封「治癒系歌手」。不過新歌《雲吞》卻令人喊完又喊，事關歌詞是她與外婆的感人故事，再加上MV由好戲之人楊詩敏（蝦頭）上陣，鏡頭前後都充滿洋蔥！

小巧認為每個家庭都有自己的一種代表食物，而她就是外婆的手造雲吞，她說：「我由婆婆湊大，小時候，婆婆每日都煮佢包嘅雲吞俾我當早餐。就好似《雲吞》歌詞所講，雖然唔係世界級美食，但獨一無二，充滿回憶，比世界上的嘅珍饈百味更珍貴，係思念嘅味道！好多謝藍奕邦作曲、黃偉文（Wyman）填詞。我記得Wyman有一日問我屋企代表食物係乜？我講咗幾樣，其中一樣係婆婆包嘅雲吞，結果就有呢份詞。」而小巧與外婆最後的「合照」更成為歌曲其中一張宣傳相片。

今次的MV，小巧只在最後一個鏡頭出現，主演是好戲之人蝦頭。拍攝時，每當她在鏡頭前喊，小巧和工作人員都被感動在鏡頭後偷偷哭泣。小巧說：「啲歌詞已經好感動，加上蝦頭演技好勁，佢好易觸動別人情緒，令人聯想到自己同家人嘅感情，將成首歌昇華，好催淚！」

私底下小巧與蝦頭是閨蜜，小巧表示二人在朋友的飯局中相識，一見如故，無所不談。蝦頭爆料：「我哋互相陪伴經歷感情風浪，甚至見証對方嘅愛情由萌芽到成長，再由枯萎到滅亡添！」不少朋友都笑指她們相似，小巧說：「Wyman曾經問我，如果我、你、林二汶和欣宜一齊打麻雀會點？拍成電影一定好搞笑！」蝦頭靈機一觸笑指新片名《我和東圈有個約會》，如果二人組成女團就命名「巧蝦力」！