維港會：陸頌雄用手機APP打小人 搵唐偉康做目標

美國駐港總領事唐偉康早前批評「一國兩制」實施情況，引起唔少風波，外交部駐港特派員公署提出嚴正交涉之餘，建制派亦有發起示威遊行狙擊。一向出位的工聯會立法會議員陸頌雄，趁今日「驚蟄」喺Facebook出文示範用手機程式「打小人」，對象就係唐偉康，仲「打」到對方面容扭曲！

陸頌雄喺Facebook貼出改圖教學，首先要影低個小人樣、寫埋名，然後跟住口訣同節奏搖動或拍打電話，直至小人面部扭曲就大功告成。他提醒大家，唔好喺返工時間用，否則個個同事都知你「打小人」。至於點解要「打」唐偉康，他話因為對方之前「衰多口」、「亂噏」，更於貼文標籤美國駐港領事館似「挑機」。

美駐港領事館事隔數小時後，喺面書發布一張「打小人」聖地鵝頸橋的照片，提醒大家「千祈唔好打錯人呀！」，疑似隔空回應。