【金像獎提名】周潤發姜皓文入圍影帝超開心 黃秋生：中咗至講啦

周潤發憑《無雙》提名最佳男主角，他表示很開心有提名，希望每位候選人都得獎，笑指可以有雙影帝、三影帝，又說對自己和其他人都有信心，所以覺得矛盾。他說：「我都睇好自己演得好，又好耐無提名，對其他人有信心，又對周潤發有信心，所以好矛盾。（會如何慶祝？）我食緊雞尾包慶祝啦，真係開心到不得了。（會否出席頒獎禮？）如果當日不用開工一定會去，咁高興咁難得。」發哥更為看好同片獲影后提名的張靜初，指對方一人分飾幾角，很有難度，斷言張靜初機會好大，一定得。
姜皓文憑《翠絲》惡鬥《無雙》周潤發和郭富城，還有《淪落人》黃秋生和《逆流大叔》吳鎮宇，坦言：「我係好緊張好緊張，因為我試過放低，加上不在香港在內地拍戲心情加倍緊張！好開心、好僥倖、好幸福，我夠㗎啦有呢個提名，行內人、觀眾、所有朋友真係好錫我、好關心我，我係一個好幸福嘅演員，多謝晒大家！」另外，他對《翠絲》有9個提名，台前幕後均感到振奮。
相反黃秋生卻回應：「入咗圍呀？入圍啫，又唔係攞獎，高興得咁早？你買六合彩你都唔會走去夜晚食餐一萬蚊嘅飯去慶祝啦，係咪？中咗至講啦。」

（1645更新）郭富城回應：「我相信每一位演員用心演出了一部好的電影作品，獲得提名一定會好開心。所以我今次能夠以《無雙》入圍男主角提名，都係好開心嘅！不過，今天更開心是知道《無雙》有17項提名，差不多大部份提名項目入面，《無雙》都有團隊入圍，我是更加開心，證明電影各個崗位的努力，令初選評委都睇到，所以我更衷心恭喜《無雙》導演同團隊們，17項提名，真的殊不容易。」
吳鎮宇則謂：「恭喜發財！支持本土電影！支持香港電影金像獎！大家開心就好啦！」