維港會:民主黨新春團拜煮黃金蝦 暗批政府「老人家都蝦」

民主黨今日舉行新春團拜，主席胡志偉及副主席尹兆堅及羅健熙，親手炮製了3道菜俾記者品嘗，包括黃金蝦、煎蘿蔔糕及豉椒炒魷魚。原來煮呢3道菜別有用意，黃金蝦是指政府「老人家都敢蝦」，煎蘿蔔糕則希望「長者年齡唔好推高」，豉椒炒魷魚就名為「紅椒司炒魷」，代表炒律政司司長鄭若驊魷魚。三人都煮得有版有眼，不過就鬧出不少搞笑事，例如胡志偉在煎完蘿蔔糕後，拿着支油問「呢支係油定洗潔精」，大家當場嚇一跳，好彩最後都冇用錯。

今年11月就係區議會選舉，胡志偉指，今年區選變數好多，對民主派而言亦非常重要，因為將代表着民主派的新力軍能否凝眾力量，希望能做到有所進帳，「話俾人聽揼石仔都有成績」。他又指，希望民主黨今年多就不同議題進行內部「交流會」，大家傾吓不同政策的方向，改善溝通，早前已有小組傾過有關區選及單程證的議題。