維港會:楊立門開騷前喉嚨發炎 搵中西醫急救保靚聲

有「AO歌王」之稱嘅廠商會行政總裁楊立門，一連兩晩喺大會堂音樂廳舉行個唱會—「好歌萬年青楊立門演唱會」，今晚首場氣氛好熱鬧。
原來楊立門早前喉嚨發炎失聲，怕好似劉德華咁因病臨時取消演唱會，於是中西合壁求醫，好彩仍可保靚聲，對歌迷都有交代。他今晚以經典流行曲《有了你》、《當年情》打嚮頭炮，跟住唱盡中英文、日文好歌，仲同dancer邊跳邊唱，又交嗰咪俾全埸觀眾一齊和唱。
近日歌神張學友舉行演唱會，一票難求。楊立門講笑咁話，如果大家買唔到學友嘅黃牛飛，可以聽佢唱學友嘅金曲，於是唱了多首學友嘅名曲。
楊立門又話，最高興有機會公開唱當年由群星合唱的香港特區成立十周年紀念主題曲《始終有你》，至like「人人能力大小也力拼 任誰留下血汗 就是個精英 香港始終有你」呢幾句歌詞。

當年同梅艷芳同場比賽，楊立門歌齡有數得計，佢話自己年紀接近近日政府所講嘅「中年」，不過好多人話佢睇落唔似，原來佢有獨家秘訣，就因為姓楊，英文串法是Young，所以不止中年，更是永遠年青，同佢演唱會主題「Raymond Young's Forever Young Concert」相呼應。
今次演唱會有雙重意義，還替贊助商廠商會旗下「廠商會中學教育基金」籌得共100萬元。政制及內地事務局局長聶德權坐足全場支持，又上台頒發紀念品予主要捐款人兼廠商會會長吳宏斌、第一副會長史立德及副會長馬介欽，3人捐款共30萬元。