靚靚嘉欣VS毛姐栢芝四影后賀歲大火併 《廉政風雲 煙幕》力戰5大笑片

豬年影業興旺、農曆新年有六部港產片賀歲火併，當中以《廉政風雲 煙幕》被睇高一綫，除有影帝劉青雲及張家輝外，更有港台兩地影后袁詠儀及林嘉欣壓陣，力戰另外兩大影后人馬包括周星馳《新喜劇之王》裏的張栢芝和王祖藍 執導《你咪理，我愛你！》中的毛舜筠。其他賀歲大片還有林敏驄《如珠如寶》、彭浩翔《恭喜八婆》等，票房大戰一觸即發！

撰文∣娛樂組

今年賀歲片是多年來所罕見，多達六部港產片齊攻新年檔期，異常熱鬧，當中有周星馳的《新喜劇之王》、彭浩翔《恭喜八婆》、三位新導演首次執導，包括王祖藍《你咪理，我愛你！》、林敏驄《如珠如寶》和丁仕昀《玩轉全家福》，不過，最有睇頭莫過於是由麥兆輝執導的《廉政風雲 煙幕》，有別一般賀歲喜劇，以打劇情牌來迎戰。

由麥兆輝執導，莊文強、黃斌擔任監製，兩位影帝劉青雲、張家輝主演的《廉政風雲 煙幕》，女主角陣容亦令人期待，港台兩地影后助陣，第一位是袁詠儀（靚靚），1994年憑《新不了情》奪得香港電影金像獎「最佳女主角」，1995年再憑《金枝玉葉》蟬聯影后。而第二位是林嘉欣，2015年憑《百日告別》在金馬獎奪得「最佳女主角」獎，兩人今次大鬥內心戲。此外，今次還跟張栢芝、毛舜筠這兩位影后人馬決戰賀歲檔，前者只是義助星爺作聲演，未有出鏡，但毛姐則在演過得獎悲劇《黃金花》後，重回到擅長的搞笑路綫，當年賀歲的《家有囍事》叫人津津樂道，未知今次會否再展爆笑絕技，看來多位影后勢必有一番惡鬥。

靚靚客串首要夠好玩

與劉青雲合作無數的靚靚，原來與導演麥兆輝更有淵源，靚靚透露：「自細我同麥兆輝住埋同一個警察宿舍，我爹哋叫佢媽媽做表姐，由於麥家有四個仔，佢媽咪好恨女，我自細就認咗麥媽媽做契媽，佢四個仔包括麥兆輝好少同我玩，可能我係女仔的關係。」

原來今次靚靚是以客串形式演出，她透露：「之前有另一個導演搵我客串，但睇完劇本我推咗，因為個角色唔好玩，我試過客串，發覺嗰場戲唔係我都無所謂，所以當麥兆輝搵我，我第一句話，客串一定要好玩，唔好玩就無謂。其實我一睇完劇本，本來想推佢，因為好多對白要講，好似報告新聞，後來麥兆輝解釋畀我聽，呢個角色人物背景，所有對白都有意思，再加上同劉青雲做，更加心動啦，咁耐無見，一定好玩，所以就接咗。」

為了《廉政風雲》，靚靚捱更抵夜：「我嗰場戲要2、3點先埋位，好耐未試過，如果你話我一直不停拍戲，當然無問題，我呢個咁輕鬆的精神狀態，突然2、3點嚟開工，拍到中間覺得自己個腦有啲轉唔到，甚至有啲舌累脷，不過好在我係專業㗎嘛，而且仲後生，頂到！」

曾經與不少男演員合作，最有默契首選是劉青雲，不過，原來兩人私底下說話不多，靚靚說：「雖然我哋拍咗十部戲，私下講咗十句說話都無，但一埋位就好明白對方，呢個真係好幸運，同佢合作的作品，最深印象唔係《新不了情》，當時同佢仲好生疏，我反而最記得《整蠱王》同《大三元》，因為已經合作過好多次，熟絡咗。」

與青雲好有默契

跟靚靚多年未有合作的劉青雲，今次合作仿如與舊女友重逢的感覺：「當導演和我說找了袁詠儀客串的時候，我都沒有太大的反應，但拍攝當日見到她的時候，真係好多回憶湧現，其實好得意，我和袁詠儀拍過好多部戲，但沒有甚麼來往，都係我的問題啦！」

靚靚笑指跟他多度合作，說的話都不夠十句，青雲笑說：「我不知道真的假的啦，見到她真有一種親切感，但問題就是這場戲我不能和她有親切感的，當她站在我的面前，望着我的時候，真係覺得見番一個以前認識的女朋友，現在她也結了婚，我也結了婚，所有事情都已經改變，有這個感覺是因為和她拍了這麼多套戲都是做情侶的，例如《新不了情》，跟住其他都係有感情戲咁樣囉。」

問到靚靚有否重遇舊男友的感覺？她笑說：「我又無咁深情，青雲令我感覺好親切，你會好信任佢，知道今日開工，同佢拍呢場戲，唔會有任何問題，無話有好怪感覺，好舒服！」

嘉欣驚到出面

繼《陀地驅魔人》後，林嘉欣在《廉政風雲 煙幕》再度與張家輝合作，甚少拍攝動作戲的嘉欣上演一場驚心動魄的飛車戲，面對連場驚險鏡頭嘉欣表現專業鎮定，原來大家都被她的演技騙倒了，停機後嘉欣驚魂未定 ，需要飲茶定驚！

這場飛車戲令嘉欣非常難忘：「澳洲同家輝一齊，喺個停車場度，我畀架車撞，原先都諗住用替身，但畫面要見到我喺車裏面，所以佢真係將我吊咗喺一個架上面，跟住真係搵架車撞我，個收音師要裝咪，佢同我講:『嘉欣，我相信你係真驚！』佢話佢收音時聽到我好沉重的呼吸聲，action嗰吓，我真係驚到谷住道氣呀。我係揸車出個停車場下一層，觀眾本身唔知有架車撞埋我度的，但我知吖嘛，所以我覺得好驚好驚，因為係好professional，安全措施做好晒，但係你真係有一下被撞擊的感覺，仲要唔係撞好多次，你撞一次之後就跳番車裏面，所以變咗你覺得『唔可以NG、唔可以NG』，喺度谷行自己，又要話俾自己聽好冷靜好冷靜，我覺得嗰場戲，我真係好驚。」

最後有沒有NG？嘉欣直說：「撞嗰吓係一吓㗎咋，後尾導演就話我係新一代動作片女星，我話:『吓，40歲先嚟玩呢啲嘢？ 好啦好啦，應酬你啦咁樣！』不過，拍完被撞嗰場戲，我條頸痛咗一段時間。」拍攝完畢後 ，嘉欣更與一班特技工作人員合照留念 ，這場驚險的動作戲亦伴隨着歡笑而完成。

願望成真

跟劉青雲合作也是嘉欣另一個夢想，今次終於如願以償，她坦言：「好多人話青雲唔出聲，但我覺得我哋都交流到喎，都講咗好多嘢，我同青雲一樣，拍戲時候唔係好鐘意離開，即係佢哋set燈呀，我哋盡可能都係留喺現場，觀察佢哋點樣去set up下一場戲，大約會知道打燈喺邊度，個鏡頭有幾大幾細，你觀察愈多，愈多ideas會出來的。」

栢芝靠把聲再現經典

張栢芝於1999年憑與周星馳合演的賀歲電影《喜劇之王》成功出位，柳飄飄的角色更成為她的經典之作之一，事隔二十年後星爺再推出《新喜劇之王》，擔任導演、監製及劇本創作的周星馳未有參與幕前演出，不過，就親自邀請了昔日的「柳飄飄」張栢芝為電影特別聲演，這亦是栢芝剛生完第三胎後第一個工作，更配合星爺四出宣傳，而內地知名演員兼票房保證的王寶強出任男主角，《新喜劇之王》成為《廉政風雲》的最大勁敵！

而栢芝於2004年與劉青雲合演《忘不了》，演一名喪偶的小巴女司機，單親苦養一名兒子，成功憑這角色登上多個頒獎禮的影后寶座。

毛姐回歸演喜劇

毛舜筠在1992年與張國榮合演的賀歲片《家有囍事》，上畫後票房高達4900萬港元，當時破了歷來票房紀錄，也是毛舜筠從影以來票房成績最好的一部。一直以來，毛姐都以演喜劇為強項，但2006年則憑《早熟》奪得香港電影金像獎最佳女配角獎，2018年更藉由敘述自閉症患者之家庭困境為主題的電影《黃金花》，榮獲從影以來首座香港電影金像獎的最佳女主角獎成功演繹一個悲劇女性。

她笑言拍悲劇很沉重，所以也想再拍喜劇，而王祖藍首次執導的歌舞喜劇《你咪理，我愛你！》，劇情改編自百老匯音樂劇《I Love You, You Are Perfect, Now Change》，就邀請了毛姐助陣，同場還有曾志偉、鄭秀文、容祖兒天后及一眾TVB小生花旦客串演出。這亦是毛姐首次挑戰歌舞片。

原文刊於《星島日報》名人雜誌（逢周日見報）