【艷福無邊】釗峰與12美少女拍MV：幸福感爆棚

釗峰近來艷福無邊，繼女神蘇麗珊為其《閃亮的青春》擔任MV女主角後，今日派台新歌《問題青年》MV，艷福加大12倍。擔任MV導演的RubberBand 6號為釗峰安排12位美少女，與他通宵拍攝。釗峰坦言心情既興奮又緊張，幸福感爆棚。

釗峰表示，新歌令他的幸福感一浪接一浪，因為邀請了陳輝陽和林夕獻曲獻詞，MV導演則由Rubber Band主音「6號」擔任，「佢從構思到落實拍攝，花咗好多心思先至得出呢個咁唯美嘅MV」。

釗峰說：「呢首歌係講兩代之間嘅矛盾，依家嘅年輕人好大嘅『無力感』，上一代嘅人成日都覺得下一代乜都不足、唔夠經驗……畀年輕人好多框框，令年輕人無所適從而產生好多問題青年，今次MV嘅少女就係用肢體動作去表達呢種無力感。」

釗峰又認為自己屬於「中代」：「我身邊有唔少90、00後嘅朋友，大家相處好快有共同話題，亦有好多超過50、60歲嘅朋友同我兄弟相稱，我覺得自己跟任何年齡人士都可以溝通到。大家試諗一諗，有時覺得下一輩唔夠經驗、想法不切實際嘅時候，諗返自己成長過程如果被前輩咁樣揩評亦唔好受，大家都後生過、都有過呢份衝勁，不妨俾多啲呢一代嘅年輕人去發揮。（你點樣同上一代溝通？）我有時會去做義工，識得點樣同啲『老友記』混熟，其實最緊要用心去溝通，有時一個微笑就夠。」