孖王菀之第3次演情侶 方力申「瀨嘢」成身濕晒

已有一段時間未有推出音樂作品的方力申，早前為好友王祖藍處男執導賀歲片《你咪理，我愛你！》拍攝一場爆笑歌舞戲份，同場更有小方近年的「御用女友」王菀之，二人繼《綁架丁丁噹》及《我的情敵女婿》後，已是第3次飾演情侶。
場口劇情講述處於「曖昧階段」的方力申與王菀之相約睇戲，小方在「冇得揀」的情況下，入場觀看了自己極不喜歡的文藝大悲劇。深信男兒有淚不輕彈的小方，原本在戲院內坐立難安，後經劇情及王菀之感染後忍不住爆喊，並大爆男人最痛三字經 -「瀨嘢喇」；至於王菀之，為了打造肉緊效果，則「爆肚」做出多個極之誇張的「傷感」表情，令導演及所有工作人員「睇一次笑一次」；二人更因表現突出，演出單元獲安排「打頭陣」。
事後二人笑言是次唱歌比平時更為虛耗體力，小方自爆唱到成身濕晒，說：「因為我嘅對手係王菀之，我梗係好大壓力啦，佢出名唱得㗎嘛。加上祖藍喺DEMO入面都唱得好出色，為咗唔好令佢哋失望，我真係出盡全力去唱，結果就唱到成身汗濕晒喇。」至於菀之則大讚方力申唱歌劇十分出色，令她眼前一亮，說：「我直頭覺得戲入面呢隻歌，可以成為我哋之後走埠登台嘅情侶檔合唱歌，小方真係唱得好好好好呀。」