點名身邊老友老得快 曹永廉：嘉穎皺晒皮

曹永廉、唐文龍、楊卓娜等出席美院店開幕，吸引大批巿民圍觀，阿廉因熱播劇《大帥哥》大受歡迎獲市民邀合照。54歲的阿廉，不單止人氣勁，保養也得宜，近日更獲網民封為「冰封俠」。問到阿廉美容心得？他笑言後生時沒有特別保養，純天然，但有感近年出現衰老跡象，故此多了關注儀容，多做保濕、敷面膜、Facial等，又會注重健康飲食少糖少鹽。他說：「其實最重要係心態，開心，個樣就會後生。」
阿廉笑指身邊個個朋友都保養得不好，更點名指鄭嘉穎、黃智賢、蕭正楠老得快，說：「我身邊個個朋友都keep得唔好，你問我身邊邊個朋友老得好快呢？一定係最老友嗰幾個，大家都知道啦，嘉穎皺晒皮；黃智賢個樣睇落仲大過我，但其實佢年紀細過我；仲有蕭正楠，有啲劇佢可以做我阿哥，佢真係要檢討下！所以喺我身邊嘅人老得快，不代表我後生，希望佢哋注重下，尤其是嘉穎唔好咁勞碌。」
問到今個新年會否叫結了婚的蕭正楠封大利是給他？阿廉笑說：「今年佢揚晒，都幾大鑊！不過佢好孤寒！唔會封畀我，叫佢封畀我啲小朋友，我啲仔女曾經當佢係偶像，雖然佢依家結咗婚，我個女對佢冇晒興趣，但都希望佢會封番封大利是畀佢哋。」
唐文龍堅稱單身沒女友，連向來有催他的爸爸都已放棄他。是否要求高？唐文龍也直認不諱：「最緊要同我夾得埋，對我阿爸阿媽好，皮膚白、唔好太瘦，至於識唔識講廣東話丶普通話、英文已經唔重要。」
楊卓娜被問會否傳授生仔秘方給妹妹楊怡？卓娜即謂：「生小朋友係講緣份，佢有自己計劃，知道媽咪有幫佢調理身體，佢自己都有食中藥調理。」