維港會：葉劉淑儀撐華為機指美國貨「好危險」 黎棟國：小米平好靚正

內地科技巨企華為集團副董事長兼首席財務官孟晚舟早前在加拿大被捕，面臨被引渡美國，事件引發外交角力，更牽連到「政客用乜嘢手機牌子」。新民黨主席、前保安局長葉劉淑儀話，依家用緊三星手機，但指華為手機都好受歡迎，之後會轉用華為機，更指通訊器材方面，用所有美國貨「都係危險嘅」。又是前保安局長的黎棟國就指，一向用緊小米手機，讚小米「平靚正」。

葉劉出席一個電台節目時說，「唔講」孟晚舟事件，講下手機，更大讚華為的手機「好受歡迎」，更強調「我唔會用蘋果，覺得唔係好安全」，她話雖然依家用緊三星機，但未來換機嘅話，實揀華為，她說：「呢間公司表現非常好，要支持下」。

她說，「除非冇取代品，否則通訊器材都會盡量避免用美國貨」，她話「美國貨危險，唔安全」。被問到「點樣唔安全?」葉劉回應指，美國當局有權監察手機，政治人物會有敏感通訊，「用國產軟件硬件都安全啲」。

該黨副主席黎棟國在另一電台節目又回應下手機話題，他先旨聲明「唔係賣廣告」，話自己以前都用過apple手機，但依家用小米，「我用小米機好耐架啦，因為佢平、靚、正」。