梁靖琪痛心柬埔寨雛妓2歲已遭施暴 推聖誕福袋捐輸助重生

近日憑網劇《蝕日風暴》人氣急升、獲網民激讚為新一代演技派女星的梁靖琪（Toby），事業得意之餘，愛情亦交出漂亮的成績單。Toby與圈外男友Jon拍拖一年多，感情穩定，近日二人應國際慈善團體AIM（Agape International Missions）邀請，到柬埔寨探訪曾被賣到妓寨的女孩。這次訪問令Toby留下深刻印象，得到男友大力支持的她，決定以行動喚醒大眾關注，將於聖誕節推出慈善福袋，並把部分收益捐到AIM，支持孩子重過新生。

Toby早前透過男友Jon，認識到國際慈善團體AIM：「Jon一向好有愛心，喺佢介紹下我接觸到AIM，今次仲同一班教會朋友，一齊到訪AIM位於柬埔寨嘅安全屋。其實我哋去過不同地方，今次係最有意義嘅一次，因為可以學到好多嘢。親眼睇到小朋友嘅經歷之後，我哋兩個都好想為AIM做更多，畀多啲愛佢哋。」Toby笑言和Jon的拍拖行程，有別於一般情侶的行街睇戲，「我哋會一齊去做義工，有時仲會帶埋屋企人幫手！呢方面我哋目標一致，嚟緊會投放更多心力喺慈善上。」

柬埔寨的安全屋內，住滿了被救出的雛妓，憶述一個又一個故事時，Toby不禁眼紅：「探訪咗一個禮拜左右，今次嘅情況好特別，因為佢哋（AIM）起咗呢間安全屋已經有10年，但係從未邀請過任何人入去幫手，今次我哋就幫佢哋油漆，陪小朋友唱歌、玩遊戲等等。」

「之前聽過有啲2歲嘅小朋友被父母賣初夜，今次見到安全屋入面最細嘅小妹妹只得3歲，覺得好心痛，諗到我周圍嘅契女、姨甥仔，覺得我哋真係擁有好多、好幸福，所以每晚我哋圍埋食飯討論時，都忍唔住流淚；臨返港前亦好唔捨得，攬住男朋友係咁喊，希望以後一年去一次，幫到佢哋更多。 」

回港後，Toby決定身體力行，以生命影響生命，於聖誕節期間推出慈善福袋，並將部分收益捐到AIM，為悲慘兒童出一分力：「嚟緊會推出全新hamper，入面有啲卡片，係安全屋嘅女童親手做嘅；另外，我哋亦會捐出朱古力禮盒嘅30%收益，支持AIM長遠發展，希望大家可以多多支持。同時亦想帶出一個訊息，有能力幫人係一件好幸福嘅事，為朋友準備聖誕禮物嘅同時，可以做埋善事，將愛分享開去，自己都會開心。」

善心爆棚的她更為AIM策劃了一系列的宣傳工作：「好開心喺嚟緊2019年可以繼續幫到AIM，去做不同嘅活動。其實佢哋喺美國已經好多人知道，但係喺亞洲地區、我哋身處嘅香港，暫時未有好多人了解到呢個機構。明年1月，會幫佢哋安排一啲活動，希望可以令多啲人認識到AIM、真正幫到佢哋。」

除了賣福袋行善，Toby最近被爆出錢襄助，幫財困的林秀怡買下大堆囤積的日本品牌安全套，Toby表示：「此舉除了是幫助朋友，亦可順道將安全性行為的訊息融入柬埔寨探訪之旅，相得益彰！總之可以幫助別人的事情，我都會盡力去做，這也是我2019年的目標。」