音樂劇開騷撞正預產期 李亞男挺肚撐老公綵排

李亞男（Leanne）雖然已佗B逾8個多月，但依然活躍，除了在生日正日與老公、家人及好友為即將誕生的囡囡舉行「Baby Shower」外，早前更捧着巨肚，低調為密鑼緊鼓綵排音樂劇的老公王祖藍打氣。

正式綵排前，導演方家煌帶領一眾演員為該劇祈禱，向來是虔誠基督徒的Leanne亦有參與其中；由於站立禱告時間頗長，Leanne不時郁動雙腳，看似有點辛苦，但她都不以為然，更投入地與所有人合唱詩歌。

當祖藍正式綵排時，Leanne則化身「得力助手」，細心欣賞老公演出的同時，更不時幫老公拍攝花絮照，兼全程看管住老公的電話、銀包及劇本，十分「廿四孝」。Leanne笑言今次探班其實是「正式捧場」，原來祖藍12月尾正式演出時候，撞正預產期。

Leanne又指，現時行動尚算方便，只是不能站立太久，「因為個肚依家真係開始大喇，企得太耐條腰係會酸嘅，但我覺得ok呀，我都依然會周圍去郁動吓，完全唔郁動其實仲辛苦。」