準爸爸開心過拎獎 鄭嘉穎聽晒老婆話避談一索得男

鄭嘉穎與陳凱琳於今年8月在峇里結婚，最近在網上公佈有喜，嘉穎今日為電影《葉問外傳：張天志》宣傳首露面，獲現場記者祝賀。他說：「恭喜發財呀！開心過拎獎、六合彩！好難形容心情，呢種喜悅係筆墨難以形容，不過太太話唔好講咁多BB啲嘢，比較緊張啲，有乜嘢問返佢。我哋全家上下，佢父母同我媽媽都緊張到不得了。」
嘉穎透露太太現時身體非常好，正常懷孕有徵狀也會有，但一切正常，又笑言太太怕他講錯說話。他說：「第一次睇BB個樣，睇超聲波好難忘的經歷。（身邊的爸爸級朋友取經？）身邊不少人做爸爸，有啲好負責任，有個同學睇住佢個仔響我屋企跌倒，佢個仔未夠一歲，有啲唔好榜樣，所以都知。」快當爸心情可會緊張？他說：「開心多啲！（BB性別是男孩？）問返我老婆啦！（計劃請假陪太太？）預產期一定會陪住，只可以講BB屬豬。（屬豬同你好夾。）咁蠢呀！」他又指有機會陪太太入產房，但細節尚未知，再有決定再通知大家。（攝影：朱偉彥）