同月同日同磅數出世 董敏莉38歲生日誕7.2磅B女

董敏莉（Monie）昨日（26日）38歲生日，同日榮升媽咪。Monie昨日開刀誕下重7.2磅女兒，她透露老公在產房陪產，一起迎接新生命來臨，並謂：「我專登揀同自己生日開刀，以後方便一齊慶祝，點知囡囡同我同月同日同磅數出世，真係緣份！我哋一早已經幫囡囡改好名，中文名叫子子，英文叫Martha。成個過程都好順利，初時都會餵人奶，希望給BB最好營養。」
Monie指生產過程驚險，因肌瘤頗大，增加手術風險。她說：「因為肌瘤阻住產道，所以醫生一早經已話要開刀，無得順產。不過醫生都講明有危險性，驚失血過多，有二千分之一機會要切除子宮，最終醫生盡力幫我止血，大小平安。不過醫生話個肌瘤都幾大，可能半年之後要做手術切除。」
Monie笑言BB未出世已經有吸金能力，好多贊助商送上BB用品，幫她省回不少支出。她表示會停工兩個月，之後再考慮復工，「電台主持嗰度我就請咗兩個月假，都等我身體回復之後就會返去開咪。其實大肚期間都有好多媽咪級嘅廣告搵我，睇來我都已經開拓左一個新市場。（會唔會考慮母女當上陣？）咁長遠梗係未諗啦，如果阿女好似我咁靚，爸爸又準許的話，都唔介意佢入行。」