面對批評和侮辱 麥明詩含淚：我都想承受到

「顛覆」指試圖改變現有社會秩序、權力、權威與等級制度之結構的嘗試，通常包含與社會價值與理論相抵觸或顛倒的過程。麥明詩敢怒敢言，顛覆港姐、甚至乎是藝人既有形象，敢於為具爭議的社會議題發聲，提倡她的中庸之道。對於網民不負責任的批評及侮辱，她含淚說：「我都想我承受到。」

撰文∣駱震寧 攝影∣李樹勳 《髮型》∣jamie lee@HAiR

相信很多觀眾都認同，麥明詩是一位「非一般港姐」。她2015年參加港姐，再而加入娛樂圈，短短三年時間，顛覆了不少觀眾心目中的港姐及藝人形象。一方面言行踩界，另一方面對具爭議的社會議題經常提出一針見血的見解。麥明詩笑笑說：「我唔喜歡隨波逐流，當有人話我有啲奇怪，我覺得係稱讚。我做很多事並非全心想顛覆，正如選港姐，我並唔係因為港姐既定是這樣子，我要去選、再把她去顛覆。我覺得刻意去顛覆一樣嘢，係未必有成效。但有時人哋未做過、卻不代表我唔可以做，入咗行之後，去到有啲位我係有刻意顛覆嘅企圖。」
企出嚟講嘢
麥明詩當選港姐冠軍翌日，被某雜誌問到會否加入「處女黨」，借口問到她是否仍是處女。她笑指對方不尊重女性而拒絕回答。她說：「你認唔認同呢個問題都好，其實都有方法避，例如一路都唔答。我嗰一刻係有少少反叛，我覺得我要企出嚟。」
麥明詩敢於網上發言，表達對不同社會現狀的意見。面對網民的批評，麥明詩都以理性角度去分析，往往令到一眾網民詞窮理屈。她說：「例如有人話麥明詩撈唔掂，咁呢一件事只不過影響到我，我唔需要企出嚟回應。反而我會選擇企出嚟講嘅嘢，可能係有爭議性、社會性的。當然我都一路拿掐緊個界綫喺邊度，我只不過係想表達我想表達嘅嘢，但有啲人會覺得你好多嘴，我明嘅，我接受呢個反應嘅。」

改變其實唔係咁簡單
麥明詩認為現今社會去做一些事，會令到社會更加分化，是沒有意義的。她說：「我覺得自己未達到自己滿意嘅智慧，其實真係好難。如果信你嘅人會信你，唔信你嘅人，只會更加唔信你。所以呢個時候你會去反思，要改變其實唔係咁簡單。或許要一個更加有智慧嘅方式，唔係你話顛覆就顛覆。」
去年12月3日，麥明詩於社交媒體，自揭2012年8月5日至12日於內地交流團遭到「性侵」。同月1日港隊「欄后」呂麗瑤亦於社交媒體公開聲稱。當時網民指責麥明詩「抽水」、「搏上位」。她眼泛淚光地說：「其實我都好實際，唔想做一啲嘢係幫唔到件事。因為無事係啱定錯，只係兩邊有縫隙而怎樣將雙方拉近。但你去提倡一個中庸之道，好容易會令到兩邊都唔會符合他們本身的立場。（你提議中庸之道，你係願意接受批評同傷害？）嗯……（呢個係必然後果。）係啊，我都想我承受到。」
好想做大狀
麥明詩於劇集《是咁的，法官閣下》飾演夏心寧，談到她法律系畢業後加入娛樂圈，於戲劇世界裏做律師有何感受。她說：「係好開心嘅！入行嘅時候都有人講，你應該拍律師劇，依家真係有得拍，某程度係達成一個未完成夢想。因為我無做律師，今次都填補到少少遺憾。但我覺得都未夠，因為劇入面做事務律師，但我真係好想做吓大狀。」

我都淆淆哋
談到無綫多年來，都有不同行業、標榜專業的劇集，但當中有不少都被觀眾狠批跟現實有很大差別。而麥明詩曾於律師行實習，談到可有同樣感受。她說：「我唔評論之前嘅律師劇，因為自己無份參演。但今次嘅編審李茜真係花多好多時間去研究，而她本身亦寫過《四個女仔三個BAR》，她對法庭的運作比我更加清楚，因為她真的訪問了很多律師同睇好多資料。但我認識好多律師朋友，亦親身經歷過讀Law嘅時候，一邊讀書一邊搵工嘅困難同心路歷程，所以我對讀法律的人睇法、彼此相處的關係和感情，我會熟悉一點。」
談到同劇的年輕演員，可有主動問及律師的真實生活及工作。她笑說：「佢哋問嘅都係技術性一啲，例如個字點讀。其實我都淆淆哋，因為自己都驚讀錯又或者唔記得咗。」她提到於英國修讀法律，回港做實習卻未正式做律師，香港法律雖源於英國，但香港回歸廿一年，而廿一年來的變遷香港已有屬於自己的路，所以廿一年來所更新的法律程序自己根本不太熟悉。
麥明詩曾提及沒有後悔過放棄律師而躋身娛樂圈，談到透過《是咁的》了解到做律師的真實情況，可有感到一絲後悔。她笑說：「其實都無嘅，我覺得自己唔適合做律師，我嘅能力唔適合，因為我唔係一個細心嘅人。而律師係要好細心思考每件事個危機在那裏，縱使個危機係0.0001都好，都要諗晒呢啲可能性出嚟。但我覺得將啲精力擺晒落0.0001度，去寫一份好長嘅合約上，對我嚟講會覺得無興趣。」問到現在是否享受做藝人？她笑說：「我enjoy、開心嘅，但係觀眾覺得我適唔適合就另一件事，哈哈！」
劇中麥明詩跟黃子恆有感情綫。她提到以往對手都是較新的小鮮肉演員，今次黃子恆對她來是最有經驗一個。她大讚對方演戲時非常穩，甚至乎拍攝時會察覺到他唸對白，因此合作得非常舒服，自己亦從中學習得很多。