跟Kay合唱再開金口 古天樂拒一齊登台：唔好要我唱Live

麥浚龍（Juno）與謝安琪（Kay）昨晚開騷，其中播放了古天樂赤裸剃鬚片段和歌聲送彩蛋，是在二人以董折、浦銘心兩個角色貫穿所有歌曲及MV後，請來古仔演出Kay第二任丈夫藍定凌，並再開金口跟Kay合唱《（一個男人）一個女人和浴室》。
Kay笑說：「古仔飾演的藍定凌係個近乎完美嘅男人，佢細心，尊重另一半，尊重愛情，遷就對方，今次以大家角色出發去唱歌，有別以往典型唱法，不再單純只係歌者演繹一首單曲，有角色有情緒，我相信大家聽歌後會感同身受，想有個咁好嘅老公。」錄音前已熟讀故事背景的古仔亦言，兩個人相處，互相尊重，關係才能維持。
古仔早前拍攝麥浚龍執導電影《風林火山》後，互相欣賞對方。古仔直言：「我唔擅長唱歌，但《一個男人》唔單係首流行曲，係整個故事嘅一部分，一個回憶，我以藍定凌嘅身份去唱，係一個表演，有劇情，就如一部電影，所以我試，假如真的會拍成電影，我也會期待。」
是次錄音愉快順利，古仔與Kay直言這次合作十分有趣，Kay打趣謂相約古仔一齊登台，古仔聞言即耍手：「做咩都得，唔好要我唱Live，呢首歌歌詞句句唔同，冇重複，我揸起支咪已有壓力喇。」Kay 笑言：「可能你之後又覺得好喜歡呢首歌，好想現場唱畀觀眾聽呢。」