梁詠琪升呢做野蠻奶奶 重現《嚦咕嚦咕》經典場面

梁詠琪（Gigi）首次擔任醫學美容代言人，早前抽空拍攝廣告重現主演的賀歲片《嚦咕嚦咕新年財》經典場口，以前在片中做新抱仔的她，今次「升呢」為野蠻奶奶，打麻雀挑機3位「準新抱」。她說：「我平時真係唔打麻雀，當日埋位拍攝，邊個方向摸牌都唔記得，要在場工作人員教我，好在拍一陣，開始有番啲記憶，總算拍得似模似樣。」
Gigi在片尾大放「彩蛋」，10秒內讀出80多個字，呼籲愛美人士尋求專家意見，十足財經節目主播讀免責聲明。為免NG，Gigi埋位前努力背誦，最終一Take過完成。