維港會：貓咪咬爛500元紙幣 貓主發文引熱論

喵星人有時可以好「百厭」！昨日有貓主在社交網站上載圖片，圖中可見一張被咬爛的500蚊紙，相信是貓所爲，貓主在貼文中感慨「真識食呀囡」。圖片隨即引起網民熱論。

貓主‎Savannah Li‎ 在facebook群組「天下貓貓一樣貓群組」發文，指「真識食呀囡，嬲到今晚唔想煮雞肉佢食」。從貓主所發圖中可見，一張500蚊紙被咬去一部分。貓主事後更新貼文表示，「相信呢度會有各位大意嘅主子，聽日update大家換銀紙成唔成功」。

不少網民表示可以去銀行換張新紙幣，但亦有人表示「有啲難」。有網民留言分享類似經驗，「換到，我問過銀行，只要number齊就得，我以前換過幾次，俾隻狗咬碎啲500蚊幾次都換到」亦有網民笑稱「一個真正嘅貓奴係唔會嬲嘅，因為你會覺得自己放得唔好，係自己唔啱！搞到主子犯錯，我下次會醒目啲架啦！主子！」、「好有良心，留番咁多俾妳」。