鄭伊健謝票除衫晒麒麟臂搞㷫全場

曾志偉、錢嘉樂、鄭伊健等挾電影《黃金兄弟》破億票房氣勢繼續兵分幾路四出到戲院謝票，觀眾好驚喜。伊健與林曉峰（Lo）昨晚迎月更賣大包除衫搞㷫全場，話說他們在其中一站謝票時，有位男觀眾對他們說：「我係嚟睇你哋5個，你哋當然有號召力，但套戲唔係我想像中咁樣，係比我想像中更好。以港產動作片嚟講係好高水準，呢個係錢嘉樂功勞，你哋5個嘅感情位都好好，呢部戲好好睇。」搞到伊健同Lo都感動又開心，二話不說就將身上印有戲名的風褸脫下送給觀眾，只穿白色背心的伊健大晒結實胸膛和麒麟臂，全場尖叫心心眼。
伊健升級版，變得更大隻原來是多得拍這戲時受傷所賜，他說：「拍戲就係咁，愈難嘅動作就冇事，我嗰次受傷做嘅動作其實好簡單，但竟然斷咗一條韌帶咁傷，我覺得自己唔夠弗，我要練得更強壯！」對於不少觀眾問有沒有續集？監製曾志偉表示會考慮，伊健就話：「有觀眾話依家呢個結局如有續集太勉強，前傳或外傳更適合。」導演錢嘉樂亦贊成，稍後他們5兄弟會繼續內地、馬來西亞等各地宣傳。
曾志偉和錢嘉特別答謝中秋節一家人拉隊捧場的觀眾，每個家庭都逐一合照，觀眾一湧而上，非常熱鬧。