香香「開心價」拍廣告 著熱褲大晒長腿

岑麗香（香香）最近一口氣接了數份工作，今次更是首次接拍足部按摩廣告，她穿熱褲上陣，大晒長腿。近期揚言努力增肥的香香，現場所見手腳依然纖幼。雖然拍攝時間長達十幾小時，但香香在拍攝現場依然活力無限，更不時做出古靈精怪的動作和表情，為現場眾多工作人員帶來不少歡樂。

問到香香的美腿秘技？她笑言：「作為藝人，經常都要長時間著住高踭鞋，腿部自然容易酸痛，所以我平時都很喜歡按摩舒緩腳部。所以今次能成為足部按摩產品的代言人，真是一舉兩得，除了有『開心價』酬勞之外，又可以免費按摩腳部，哈哈。」問到酬勞有否7位數字（以百萬計）時，香香即大晒甜美笑容回應謂：「哎吔，總之係開心價啦！」再問她為何工作長達十數小時，都可以愈做愈精神？香香表示：「因為呢個廣告真係好寫意，我唔係坐喺度就係挨喺度，仲要按住腳咁，根本係享受。我仲有趁拍合眼表情嘅時候順便闔一闔，好有叉電作用㗎。」

香香即將遠赴歐洲出席時裝活動，她透露此行將拋下老公隻身前往歐洲，不過香香卻笑指不會掛念老公，並謂：「我期待咗出席時裝活動已經好耐㗎喇，所以興奮都嚟唔切呀！」