與古天樂默契依舊 宣萱帶醉上陣拍煞科戲嗌正

古天樂、宣萱、姜皓文（黑仔）、張繼聰、顏卓靈等主演的懸疑電影《犯罪現場》，經過約3個月的拍攝，日前凌晨終於煞科。監製爾冬陞更拿著酒杯，帶頭「吹喇叭」跟大家飲勝，酒量淺的宣萱在現場氣氛高漲下，與眾演員開心乾杯，結果半醉下完成全組最後一場戲。

宣萱酒後開工，反而有意外驚喜，笑說：「初初飲酒我都冇事，後來古仔走埋嚟再倒多大半杯畀我，同我乾杯就出事啦，個人開始傻笑！點知反而拍出嚟效果好好，因為場戲講我視力有問題，飲咗酒對眼有啲focus唔到，完全有嗰個感覺，導演仲話早知我哋每次飲少少酒先拍啦！」事隔多年再與古仔合作，宣萱謂兩人默契依舊：「初初開工都有點擔心，古仔喺現場好認真，古仔依然係古仔，有咩事都有傾有講，所以所有嘢都好舒服好順利。」