【最後節目】盧凱彤獲愛貓精神上照顧 揭太太更得寵物歡心

盧凱彤（Ellen）本月5日在跑馬地住所墮斃，終年32歲。今年5月她曾帶15歲愛貓蘇菲上ViuTV節目《晚吹-喵喵喵》做訪問，分享與家中4隻貓貓的點滴。節目在昨晚播映，亦是Ellen生前最後一個節目專訪。

視貓貓為家人的Ellen，入行兩年獲唱歌老師送贈貓女蘇菲，之後再養3隻貓仔Thom Thom、DJ及Juno。Ellen自認偏心蘇菲，因牠陪伴度過躁鬱症低潮期，「佢一啲都唔嗲，我好記得躁鬱症期間係冇做嘢，蘇菲係一隻特別有靈性嘅貓，有一段時間自己匿埋喺屋企喊，或是情緒好低落好低落嘅時候，蘇菲平時就唔理我嘅，自己喺梳化瞓。但喺我喊嘅時候，佢係唯一一隻會好主動行埋嚟伏喺我度，等我喊完佢就會走開，佢真係冇嘥我米飯。」

Ellen感言貓貓就像家人，令她心安，回家可與蘇菲傾訴心事，笑言其他3隻貓是蘇菲的「同居密友」。事實上她也愛錫牠們，睡覺時會攬貓貓，又指其他3隻貓沒蘇菲醒目，IQ、EQ都較低，喜歡牠們很傻氣。

去年本想移民台灣的Ellen為蘇菲擱置計劃，因為搭飛機前帶貓貓打針、登記及檢查血液中的瘋狗症抗體，才可帶寵物入境，可是蘇菲打了兩次針都沒產生抗體，最後決定不移民，曾在台灣發展事業的Ellen也多留在香港照顧貓貓。

原來Ellen的台籍太太余靜萍更得貓貓歡心，Ellen稱：「佢有個怪癖，就係同啲貓配音同講嘢，譬如：『今天我很悶呀！』、『今天回家真的要吃好一點，不吃好一點真的不能睡呀！』」佢同貓講嘢多過同我講嘢，好怪！佢叫我配音，我話真係唔識配，冇咁大想像力。」

談到想對蘇菲說的話，Ellen摸著蘇菲笑指：「我真係多得你唔少呀！」她又說支持領養，不放棄養愛貓，又稱：「多謝蘇菲，多謝我啲貓，成為我生活裏面不可缺少嘅一份子，甚至比我嘅另一半更加認識我。喺我獨立生活呢段日子，其實唔係我照顧佢，係佢哋喺精神上照顧我。」